ئیمانوێل ماکرۆن، سەرۆک کۆماری فەرەنسا، دوای کوژرانی سەربازێکی وڵاتەکەی لە باشووری لوبنان، داوای لە دەسەڵاتدارانی ئەو وڵاتە کرد ئاسایشی هێزەکانی ئاشتیپارێزی نێودەوڵەتی (یونێفێل) بپارێزن و حزبوڵای لوبنانیشی بە ئەنجامدانی ئەو هێرشە تۆمەتبار کرد.
ئەمڕۆ شەممە، ئیمانوێل ماکرۆن سەرۆک کۆماری فەرەنسا، لە دوو پەیوەندیی تەلەفۆنی جیاوازدا لەگەڵ جۆزێف عەون، سەرۆک و نەواف سەلام، سەرۆکوەزیرانی لوبنان، داوای لێکردن "ئاسایشی سەربازانی یونێفێل" گەرەنتی بکەن. ئەمەش دوای ئەوە هات کە لە ئەنجامی هێرشێک بۆ سەر هێزەکانی ئاشتیپارێز لە باشووری لوبنان، سەربازێکی فەرەنسی کوژرا و سێ سەربازی دیکەش بریندار بوون.
ماکرۆن لە پۆستێکدا لە هەژماری فەرمی خۆی لە تۆڕی کۆمەڵایەتی (X) ڕایگەیاند: "هەموو ئاماژەکان بۆ ئەوە دەچن کە حزبوڵڵا لە پشت ئەو هێرشەوە بێت". هەروەها داوای لە دەسەڵاتدارانی لوبنان کرد کە بە زووترین کات لێکۆڵینەوەی ورد لەبارەی ڕووداوەکە بکەن و ئەنجامدەرانی بدۆزنەوە و ڕاپێچی دادگایان بکەن. سەرۆککۆماری فەرەنسا جەختی لەوەش کردەوە کە نابێت بە هیچ شێوەیەک هێزەکانی پاراستنی ئاشتی بکرێنە ئامانج.
کۆمێنت (0)
تا ئێستا هیچ کۆمێنتێک نەکراوە.