حکوومەتی ئیسرائیل پێشوازی لە بەرەوپێشچوونی دانوستانەکانی لەگەڵ لوبنان کرد و ڕایگەیاند، ئەم لێکتێگەیشتنانە "دەرفەتێکی مێژوویی"ن بۆ لاوازکردن و کۆتاییهێنان بە نفووز و هەژموونی حیزبوڵا لە ناوچەکەدا.
حکوومەتی ئیسرائیل ئاماژەی بەوە کرد کە ئامانجی سەرەکییان لەم گفتوگۆیانە، جێگیرکردنی ئاسایشە لە سنوورە باکوورییەکانی وڵاتەکەی و ڕێگریکردنە لەوەی حیزبوڵڵا بتوانێت جارێکی دیکە هەڕەشە بۆ سەر هاووڵاتییانی ئیسرائیل دروست بکاتەوە. جەختیشی کردەوە کە هەر ڕێککەوتنێک دەبێت گەرەنتی ئەوە بدات کە حیزبوڵڵا لە ناوچە سنوورییەکان پاشەکشە بکات و تواناکانی بۆ هێرشکردن سنووردار بکرێن.
جێی ئاماژەیە، لە دوای 8ی ئۆکتۆبەری 2023وە، گرژی و پێکدادانی سەربازی لە نێوان ئیسرائیل و حیزبوڵڵا بەردەوامی هەبووە، کە زیانێکی زۆری مرۆیی و ماددی لە هەردوو لایەنی سنوورەکە لێکەوتووەتەوە. ئەم هەوڵە نوێیانەی ئیسرائیل بۆ ڕێککەوتن لە کاتێکدایە، کە کۆمەڵگەی نێودەوڵەتی و بەتایبەت ئەمریکا فشارێکی زۆر دەکەن بۆ ئەوەی ئاگربەستێکی هەمیشەیی بێتە کایەوە و لوبنان لە مەترسییەکانی جەنگێکی وێرانکەر دووربخرێتەوە، کە تێیدا حیزبوڵڵا وەک لایەنێکی سەرەکیی ململانێکە دادەنرێت.
کۆمێنت (0)
تا ئێستا هیچ کۆمێنتێک نەکراوە.