دۆناڵد ترەمپ، سەرۆکی ئەمریکا، وردەکاریی دانوستانە چڕەکانی نێوان واشنتۆن و تارانی لە شاری ئیسلام ئابادی پاکستان ئاشکرا کرد و ڕایگەیاند، سەرەڕای گفتوگۆیەکی درێژخایەن، تاران ئامادە نییە واز لە تەماحە ئەتۆمییەکانی بهێنێت.
ترەمپ ئاماژەی بەوە کردووە کە ئێران بەڵێنی دابوو گەرووی هورمز بکاتەوە، بەڵام بە ئەنقەست شکستی هێناوە. ناوبراو گوتی: ئەوان دەڵێن مین لە ئاودایە، لە کاتێکدا تەواوی هێزی دەریایی و کەشتییە مێنڕێژکەرەکانیان تێکشکێندراون. ترەمپ جەختی کردەوە کە دەبێت ئەم ڕێڕەوە نێودەوڵەتییە بە خێرایی بکرێتەوە چونکە داخستنی بووەتە هۆی زیانگەیاندن بە وڵاتانی جیهان.
سەرۆکی ئەمریکا ئاشکرای کرد کە کۆبوونەوەکە لە بەیانییەوە تاوەکو درەنگانی شەو بەردەوام بووە و نزیکەی 20 کاتژمێری خایاندووە. تێیدا شاندی ئەمریکا (جەی دی ڤانس، ستیڤ ویتکۆف و جارید کوشنەر) لەگەڵ شاندی ئێران (محەمەد باقر قالیباف، عەباس عێراقچی و عەلی باقری) گفتوگۆیان کردووە. ترەمپ ئاماژەی بەوە کرد کە نوێنەرەکانی ئەمریکا بە ڕێزەوە مامەڵەیان لەگەڵ نوێنەرانی ئێران کردووە، بەڵام لایەنی ئێرانی لەسەر پرسی ئەتۆمی سوور و نەرمییان نواندووە.
ترەمپ ڕایگەیاند: تەنیا یەک شت هەیە کە گرنگە، ئەویش ئەوەیە ئێران نایەوێت واز لە تەماحە ئەتۆمییەکانی بهێنێت. ناوبراو جەختی کردەوە کە ڕێگە نادەن وزەی ئەتۆمی بکەوێتە دەستی خەڵکێکی پێشبینینەکراو و سەخت و دووپاتی کردەوە: ئێران هەرگیز نابێتە خاوەنی چەکی ئەتۆمی.
لە پەیامەکەیدا، ترەمپ ستایشی ڕۆڵی سەرکردایەتیی پاکستانی کرد (مارشاڵ عاسم مونیر و سەرۆکوەزیران شەهباز شەریف) بۆ ڕێکخستنی دانوستانەکان. هەروەها ئاماژەی بەوە کرد کە ئەوان سوپاسیان کردووە بۆ ڕێگریکردن لە هەڵگیرسانی جەنگێکی وێرانکەر لە نێوان هیندستان و پاکستان کە دەکرا ببێتە هۆی گیانلەدەستدانی 30 بۆ 50 ملیۆن مرۆڤ.
ئەم لێدوانانەی ترەمپ ئاماژەیەکی ڕوونە بۆ ئەوەی کە سەرەڕای هەوڵە دیپلۆماسییەکان، کێشەی سەرەکیی نێوان واشنتۆن و تاران کە پرسی چەکی ئەتۆمییە، هێشتا بەبێ چارەسەر ماوەتەوە و ئەمریکا ئامادە نییە لەو پرسەدا هیچ سازشێک بکات.
کۆمێنت (0)
تا ئێستا هیچ کۆمێنتێک نەکراوە.