وەزارەتی دەرەوەی کوێت ڕۆژی چوارشەممە بە فەرمی "زەید عەباس شەنشول" کارداری باڵیۆزخانەی عێراقی لە وڵاتەکەی بانگ کرد، ئەمەش وەک ناڕەزایەتییەکی توند بەرامبەر کارەکانی "هەڵکوتانە سەر و تێکدان" کە کراوەتە سەر تەلاری کونسوڵخانەی گشتیی کوێت لە شاری بەسرە.
لە یاداشتێکی فەرمیدا کە ڕادەستی لایەنی عێراقی کراوە، کوێت داوای کردووە حکومەتی بەغدا ڕێکاری بەپەلە و توند بگرێتە بەر بۆ ڕاوەدوونان و سزادانی هەموو ئەو کەسانەی تێوەگلاون لەم کارانە و گەرەنتی بکات کە جارێکی تر ڕووداوی لەو شێوەیە لە داهاتوودا دووبارە نەبێتەوە.
ئەم ئاڵۆزییە دیپلۆماسییە دوای ئەوە دێت کە ڕۆژی سێشەممە دەیان کەس لە بەردەم کونسوڵخانەی کوێت لە بەسرە خۆپیشاندانیان ئەنجامدا و هەوڵی چوونە ناو تەلاری کونسوڵخانەکەیان دا، کە دواتر هێزە ئەمنییەکان بە گازی فرمێسکڕێژ بڵاوەیان پێ کردن.
پەرەسەندنی تووڕەیی خۆپیشاندەران لە دوای ئەوە هات کە بەهۆی بۆردومانێکی نادیارەوە لە پارێزگای بەسرە، لانیکەم 3 مەدەنی کوژران؛ لە کاتێکدا هەندێک سەرچاوەی ئەمنیی عێراق بانگەشەی ئەوەیان کردووە کە موشەکەکان "لە خاکی کوێتەوە" ئاراستەی ناوچەکە کراون.
ئەم ڕووداوانە لە چوارچێوەی هەڵکشانی جەنگێکی فراواندایە کە لە 28ی شوباتی 2025وە بەهۆی هێرشی ئەمریکا و ئیسرائیل بۆ سەر ئێران ناوچەکەی گرتووەتەوە. لەو کاتەوە گروپە چەکدارەکانی عێراق کە بە "بەرگریی ئیسلامی" ناسراون، بەردەوامن لە ئاراستەکردنی موشەک و درۆن بۆ سەر ئەو بنکانەی کە وەک "ئامانجی دوژمن" لە وڵاتانی ناوچەکە وەک کوێت و ئوردن وەسفیان دەکەن، ئەمەش پەیوەندییە دیپلۆماسییەکانی نێوان وڵاتانی دراوسێی گەیاندووەتە ئاستێکی مەترسیدار.
کۆمێنت (0)
تا ئێستا هیچ کۆمێنتێک نەکراوە.