هەموو ئەو ئیدیعایانەی سوپای پاسدارانی ئێران لەبارەی ئەنجامدانی هێرش بۆ سەر شوێنی نیشتەجێبوونی فڕۆکەوان و ستافی ئاسمانیی ئەمریکا لە عەرەبستانی سعودیە ڕەت کرانەوە و بە "چەواشەکاری" ناوبران لە لایەن فەرماندەی ناوەندی ئەمریکاوە.
سوپای پاسدارانی ئێران بانگەشەی ئەوەی کردبوو کە لە ڕێگەی درۆن و مووشەکەوە هێرشیان کردووەتە سەر کۆبوونەوەیەکی 200 کەسی لە فڕۆکەوانە ئەمریکییەکان لە خاکی سعودیە، بەڵام سەرچاوە فەرمییەکان دووپاتیان کردەوە کە ئەم هەواڵە هیچ بنەمایەکی ڕاستیی نییە و هیچ سەرباز و کارمەندێکی ئەمریکی لەو وڵاتەدا تووشی هیچ هێرشێک نەبووە.
پێشتریش لە 28ی ئاداری ڕابردوودا، فەرماندەکانی ڕژێمی ئێران هەمان ئیدیعایان بۆ شاری دوبەی بڵاوکردبووەوە، کە ئەو کاتیش دەرکەوت هەواڵێکی ناڕاست بووە و تەنیا بۆ مەبەستی پڕوپاگەندە بەکارهاتووە.
چاودێران ئاماژە بەوە دەکەن کە بڵاوکردنەوەی ئەم جۆرە هەواڵە چەواشەکارییانە، هەوڵێکی بێئومێدانەی سوپای پاسدارانە بۆ شاردنەوەی ڕاستییەکان و پەردەپۆشکردنی ئەو شکست و زیانە گەورانەی کە بە هۆی هێرشە بەردەوامەکانی سوپای ئەمریکا لە توانای سەربازیی هێزەکانی ئێران کەوتووە.
کۆمێنت (0)
تا ئێستا هیچ کۆمێنتێک نەکراوە.