وەزارەتی کشتوکاڵ و سەرچاوەکانی ئاوی حکوومەتی هەرێمی کوردستان بڕیاری دا بە هەڵگرتنی قەدەغەی سەر هاوردەکردنی بەرهەمی تەماتە لە دەرەوەی وڵات، ئەمەش دوای ئەوەی دەرکەوت كە بەرهەمی ناوخۆیی لە بازاڕەکاندا کەمبووەتەوە و نرخەکەی بە شێوەیەکی بەرچاو بەرزبووەتەوە.
بەپێی ڕاگەیەندراوێکی وەزارەتی کشتوکاڵ، دوای بەدواداچوونی مەیدانی بۆ بەرهەمی تەماتە لە سەرجەم سنووری بەڕێوەبەرایەتییە گشتییەکانی کشتوکاڵی پارێزگاکان و ئیدارە سەربەخۆکانی هەرێمی کوردستان، دەرکەوتووە کە ئەو بەرهەمە لە بازاڕەکاندا کەمبووەتەوە. هەر بۆیە وەزارەت پاڵپشت بە یاسای ژمارە 4ی ساڵی 2008ی پاراستن و پێشخستنی بەرهەمە کشتوکاڵییەکان، بڕیاری دا بە ڕێگەدان بە هاوردەکردنی تەماتە.
وەزارەتی کشتوکاڵ ئاماژەی بەوە کردووە، ئەم بڕیارە لە ڕێکەوتی 29/3/2026 دەچێتە بواری جێبەجێکردنەوە و لایەنە پەیوەندیدارەکانیش ڕاسپێردراون کاری پێویست ئەنجام بدەن، ئەمەش بە مەبەستی ڕێکخستنەوەی نرخ و دابینکردنی پێداویستیی هاووڵاتییان لە بازاڕەکانی هەرێمی کوردستاندا.
کۆمێنت (0)
تا ئێستا هیچ کۆمێنتێک نەکراوە.