وەزیری دەرەوەی ئێران لە پەیامێکدا بۆ نێچیرڤان بارزانی، سەرۆکی هەرێمی کوردستان، هێرشە درۆنییەکەی سەر ماڵی بەڕێزیانی لە دهۆک ئیدانە کرد و هۆشداریی لە "فتنەگێڕی" ئەمریکا و ئیسرائیل دا.
عەباس عێراقچی، وەزیری دەرەوەی ئێران لە پەیامەکەیدا وێڕای شەرمەزارکردنی ئەم هێرشە تیرۆریستییە، هیوای سەلامەتی بۆ نێچیرڤان بارزانی خواست. عێراقچی ئاماژەی بە مێژووی "فتنەگێڕی و دووبەرەکی" ئەمریکا و ئیسرائیل کرد لە نێوان وڵاتانی ناوچەکە و دراوسێکاندا، جەختیشی کردەوە کە ئەم جۆرە هێرشانە زۆرجار وەک ئۆپەراسیۆنی "ئاڵای درۆینە" بۆ نانەوەی ئاڵۆزی ئەنجام دەدرێن.
عەباس عێراقچی داوای لە حکوومەتەکان و دامەزراوە نێودەوڵەتییەکان کرد کە بەرپرسیارێتی خۆیان هەڵبگرن بۆ سزادانی ئەمریکا و ئیسرائیل لە بەرانبەر ئەوەی بە "دەستدرێژیی دڕندانە" بۆ سەر ئێران و هێرشە نایاسایی و تیرۆریستییەکان بۆ سەر عێراق وەسفی کرد.
ئەم پەیامەی وەزیری دەرەوەی ئێران لە کاتێکدایە، کە بەئامانجگرتنی ماڵی سەرۆکی هەرێمی کوردستان لە پارێزگای دهۆک، شەپۆلێکی فراوانی ئیدانەکردنی لەسەر ئاستی نێوخۆیی و نێودەوڵەتی لێکەوتووەتەوە و وڵاتانی ناوچەکەش بە بایەخەوە دەڕواننە لێکەوتە ئەمنی و سیاسییەکانی ئەم پەرەسەندنە نوێیانە لە چوارچێوەی ئەو گرژییە سەربازییانەی کە ناوچەکەی گرتووەتەوە.
کۆمێنت (0)
تا ئێستا هیچ کۆمێنتێک نەکراوە.