ئێران بە مووشەک هێرشی کردە سەر عەراد و دیمۆنا و دەیان بریندار هەن

ڕۆژی شەممە، ئێران شەپۆلێکی گەورەی مووشەکی ئاراستەی چەند ناوچەیەکی ئیسرائیل کرد و شارەکانی عەراد و دیمۆنای لە باشووری ئەو وڵاتە پێکا، کە بەهۆیەوە دەیان کەس بریندار بوون و زیانی گەورە بەر باڵەخانەکان کەوتووە، بەپێی ئامارەکان تەنیا لە شاری عەراد 100 کەس بریندار بوون.
دەزگای فریاکەوتنی ئیسرائیل ڕایگەیاند کە لە شاری عەراد مامەڵە لەگەڵ "ڕووداوێکی گەورە" دەکەن و تا ئێستا 100 برینداریان گواستووەتەوە بۆ نەخۆشخانەی سۆرۆکا، ئاماژە بەوەش کراوە کە دۆخی 23 لە بریندارەکان مەترسیدارە و تیمەکان خەریکی گەڕانن بەدوای بێسەروشوێنبووان لەژێر داروپەردووی باڵەخانە ڕووخاوەکاندا.
هاوکات زەنگی ئاگادارکردنەوە لە ناوچەکانی نەقەب، دەریای مردوو، جەلیل، گۆلان و حەیفا لێدرا، کەناڵی 12ی ئیسرائیلیش پشتڕاستی کردەوە کە پارچەی مووشەک لە دەریای مردوو و دەوروبەری شارۆچکەی عەراد لە بیابانی نەقەب کەوتوونەتە خوارەوە.
لەلایەکی دیکەوە، شاری دیمۆنا کە دامەزراوەیەکی ئەتۆمیی لێیە، ڕووبەڕووی هێرشی مووشەکی بووەوە و بەهۆیەوە لانی کەم 39 کەس بریندار بوون. سوپای ئیسرائیل جەختی کردەوە کە مووشەکێکی ڕاستەوخۆ بەر باڵەخانەیەک لەو شارە کەوتووە و تۆپەڵە ئاگرێکی گەورەی دروست کردووە.
تەلەڤزیۆنی فەرمیی ئێران ڕایگەیاند کە ئەم هێرشە وەک وەڵامێک بووە بۆ هێرشی پێشتری ئیسرائیل بۆ سەر دامەزراوەی ئەتۆمیی نەتەنز لە ناوەڕاستی ئێران.