فراکسیۆنی پارتی لە پەرلەمانی عێراق: لێدوانەکانی بهاء ئەعرەجی بێڕێزییە بە دەستوور

فراکسیۆنی پارتی دیموکراتی کوردستان لە پەرلەمانی عێراق، بە توندی سەرکۆنەی لێدوانەکانی پەرلەمانتار بهاء ئەعرەجی دەکات و ڕایگەیاند، ئەو گوتارە ژەهراوییە بێڕێزییەکی ڕاشکاو بە بنەما دەستوورییەکان نیشان دەدات و سەرۆکایەتی ئەنجومەنی نوێنەران کەمتەرخەمە لە ئەرکە دەستوورییەکانی بۆ پاراستنی شکۆی دامەزراوەی یاسادانان و پاراستنی دەقەکانی دەستوور.

دەقی بەیاننامەکەی فراکسیۆنی پارتی لە پەرلەمانی عێراق:

فراکسیۆنە پەرلەمانییەکەمان، بە توندی سەرکۆنە و ڕەتکردنەوەی  ئەو لێدوانە  دەکات کە لەلایەن پەرلەمانتار بهاء الاعرجی داویەتی لە ناو ئەنجومەنی نوێنەران، کە بەزاندنێکی ڕاشکاوی دەستووری عێراق و دابەزینێکی قبوڵنەکراوی گوتاری سیاسییە لەژێر چەتری پەرلەماندا.

ئەوەی گوتراوە تەنها جیاوازی بیروبۆچوون نەبووە، بەڵکو گوتارێکی ژەهراوییە و بێڕێزییەکی ڕاشکاو بە بنەما دەستوورییەکان نیشان دەدات و هەوڵێکی بێهودەیە بۆ بچووککردنەوەی هەرێمی کوردستان و دامەزراوە سەروەرییەکانی و ناساندنی سەرکردەکانی بە سیفەتی کارگێڕی کە لەگەڵ پێگە دەستوورییەکەیان ناگونجێت. 

ئەم تێڕوانینە پێشێلکردنی ڕوونی ماددە دەستوورییەکانی (112، 114، 115، 116، 117، 121) کە پەیوەندی نێوان ناوەند و هەرێمیان لەسەر بنەمای هاوبەشییەکی هاوسەنگ نەک پاشکۆیەتی ڕێکخستووە.

لێرەوە، بۆ ڕای گشتی دووپاتی دەکەینەوە:

1. شەرعییەتی دەستووری (ماددەی 117): دەسەڵاتەکانی هەرێم (یاسادانان، جێبەجێکردن، دادوەری) دەسەڵاتی هەرێمێکی فیدراڵین کە دەستوور چەسپاندوویەتی و سەرۆک وەزیرانی هەرێم و وەزیرەکان ئەرکەکانیان بەپێی ڕاسپاردەیەکی دەستووری تەواو لە گەلەکەیانەوە ئەنجام دەدەن، ئەوان "فەرمانبەر" نین لای هەوسی سیاسییە گۆڕاوەکان.

2. باڵادەستی یاسا (ماددەی 115): دەستوور پێشینەیی داوە بە یاسای هەرێم لە کاتی هەبوونی ناکۆکی لە پسپۆڕییە هاوبەشەکاندا، بۆیە زمانی "فەرمان و ئینزار" زمانێکی دەرچووە لە یاسا و دەستوور و نیشانەی عەقڵییەتێکی ناوەندگەرێتی کۆنە.

3. سەرکۆنەکردنی کەمتەرخەمی سەرۆکایەتی: ئێمە سەرکۆنەی بێدەنگی و کەمتەرخەمی سەرۆکایەتی ئەنجومەنی نوێنەران دەکەین لە ئاست ئەم دەستدرێژییە، کە ئەمەش کەمتەرخەمییە لە ئەرکە دەستوورییەکانی بۆ پاراستنی شکۆی دامەزراوەی یاسادانان و پاراستنی دەقەکانی دەستوور لە موزایەدەی سیاسی.

هەروەها جەخت دەکەینەوە کە بەردەوامبوون لەم گوتارە دوژمنکارانە  تەنها خزمەت بە دوژمنانی عێراق دەکات و هەوڵێکی ئاشکرایە بۆ تێکدانی ئەو پەیمانە کۆمەڵایەتییەی کە کۆمان دەکاتەوە. دەبێت تێبگەن کە سەردەمی "ناوەندگەرێتی چەوسێنەر" بەبێ گەڕانەوە کۆتایی هاتووە، و دەستوور دادوەر و یەکلاکەرەوەیە، هەرکەسێکیش ناتوانێت دەستوور بخوێنێتەوە ولێ تێناگات، با واز لە سیاسەت بهێنێت پێش ئەوەی وڵات تووشی قەیرانێک بکات کە دەرەنجامەکەی باش نابێت.

فراکسیۆنی پارتی دیموکراتی کوردستان لە پەرلەمانی عێراق