یسرائیل کاتز، وەزیری بەرگری ئیسرائیل هەڕەشەیەکی توندی ئاراستەی سەرکردایەتیی داهاتووی کۆماری ئیسلامی ئێران کرد و ڕایگەیاند، هەر کەسێک وەک ڕێبەری نوێی ئەو وڵاتە دەستنیشان بکرێت، لەلایەن ئەوانەوە دەکرێتە ئامانج.
کاتز لە هەژماری فەرمیی خۆی لە تۆڕی کۆمەڵایەتی "ئێکس" نووسیویەتی: "هەر ڕێبەرێک لەلایەن ڕژێمی ئێرانەوە دابنرێت بۆ ئەوەی بەردەوامی بە بەرنامەی لەناوبردنی ئیسرائیل بدات، یان هەڕەشە لە ئەمریکا و جیهانی ئازاد و وڵاتانی ناوچەکە بکات و بەردەوام بێت لە سەرکوتکردنی گەلی ئێران، ئامانجی ئێمەیە بۆ سڕینەوە و لەناوبردن."
وەزیری بەرگریی ئیسرائیل جەختیشی کردووەتەوە کە "گرنگ نییە ناوی ئەو کەسە چییە و لە کوێ خۆی حەشار دەدات"، ئاماژەی بەوەش کرد وڵاتەکەی بە هەماهەنگی لەگەڵ هاوبەشە ئەمریکییەکانی، بەردەوام دەبێت لە تێکشکاندنی تواناکانی ڕژێمی تاران و خەریکن بوار خۆش دەکەن بۆ ئەوەی گەلی ئێران خۆیان ئەو دەسەڵاتە بڕوخێنن.
ئەم لێدوانانەی وەزیری بەرگریی ئیسرائیل لە کاتێکدایە کە هەندێک لە میدیاکان، بڵاویان کردووەتەوە "موجتەبا خامنەیی"، کوڕی ڕێبەری پێشووی ئێران، لەژێر فشاری سوپای پاسداران وەک ڕێبەری نوێی کۆماری ئیسلامیی ئێران هەڵبژێردراوە.
کۆمێنت (0)
تا ئێستا هیچ کۆمێنتێک نەکراوە.