ئەمڕۆ، 21ـی شوبات، لە سەرانسەری جیهاندا یادی "ڕۆژی نێودەوڵەتیی زمانی دایک" دەکرێتەوە. ئەم یادە لەلایەن ڕێکخراوی یونسکۆوە وەک هەوڵێک بۆ بەرزڕاگرتنی فرەچەشنیی زمانەوانی و کولتووری دەستنیشانکراوە، ئەمساڵ لە ژێر دروشم و ئاراستە نوێیە نێودەوڵەتییەکاندا جەخت لەسەر "پەروەردەی فرەزمانە" وەک بنەمایەکی سەرەکی بۆ گەشەپێدانی کۆمەڵایەتی دەکاتەوە.
ڕەگ و ڕیشەی ئەم ڕۆژە دەگەڕێتەوە بۆ ساڵی 1952، کاتێک ژمارەیەک خوێندکار لە شاری داکا (پایتەختی ئێستای بەنگلادیش) لە پێناو ناساندنی زمانی دایکیان وەک زمانێکی فەرمی، گیانیان بەخت کرد. لە ساڵی 1999دا، کۆنفڕانسی گشتیی یونسکۆ بە فەرمی ئەم ڕۆژەی وەک ڕۆژێکی جیهانی ناساند، بە ئامانجی هۆشیارکردنەوەی گەلان لە مەترسیی لەناوچوونی زمانە کەمینەکان.
لە ڕوانگەی یاسا نێودەوڵەتییەکان و ڕێککەوتنامەکانی مافی مرۆڤەوە، خوێندن و ئاخاوتن بە زمانی دایک تەنها پێویستییەکی کولتووری نییە، بەڵکو مافێکی بنەڕەتییە. پسپۆڕانی پەروەردە کۆکن لەسەر ئەوەی کە فێربوون بە زمانی دایک لە قۆناغەکانی سەرەتاییدا، ئاستی تێگەیشتن و داهێنانی تاک بە ڕێژەیەکی بەرچاو بەرز دەکاتەوە و دەبێتە هۆی پاراستنی مێژووی زارەکی و کەلەپووری نەتەوەکان.
بەپێی ڕاپۆرتە فەرمییەکانی نەتەوە یەکگرتووەکان، نزیکەی 40٪ی دانیشتووانی جیهان دەستیان بە پەروەردەیەک ناگات کە بەو زمانە بێت کە تێیدا دەدوێن یان تێیدا گەورە بوون. یونسکۆ هۆشداری دەدات کە لەدەستدانی هەر زمانێک، بە واتای لەدەستدانی بەشێکی گرنگ لە عەقڵیەت و میراتی مرۆڤایەتی دێت.
یادکردنەوەی ئەم ڕۆژە، بانگەوازێکی فەرمییە بۆ هەموو حکوومەت و ناوەندە بڕیاربەدەستەکان، تا سیاسەتی زمانەوانیی وایە پەیڕەو بکەن پارێزگاری لە مافی زمانەوانیی هەموو پێکهاتەکان بکات، چونکە زمانی دایک دواین قەڵای پاراستنی ناسنامەی مرۆڤە لە جیهانێکی گۆڕاودا.
کۆمێنت (0)
تا ئێستا هیچ کۆمێنتێک نەکراوە.