کەشناسی هەرێم پێشبینی بارانبارین و نزمبوونەوەی پلەکانی گەرما دەکات

بەڕێوەبەرایەتی گشتی کەشناسی و بوومەلەرزەزانی هەرێمی کوردستان، لە ڕاگەیەندراوێکی فەرمیدا پێشبینییەکانی خۆی بۆ باری کەشوهەوای 48 کاتژمێری داهاتوو بڵاوکردەوە. بەپێی ڕاگەیەندراوەکە، پێشبینی دەکرێت هەرێمی کوردستان بکەوێتە ژێر کاریگەری شەپۆلێکی بارانبارین و نزمبوونەوەی پلەکانی گەرما.

ئەمڕۆ شەممە، بەڕیوەبەرایەتی کەشناسی هەرێم رایگەیاند: ئاسمانی هەرێم بە گشتی بە هەوری باراناوی دەمێنێتەوە و لە زۆربەی ناوچەکان نمەباران و بارانی مامناوەند بە پچڕپچڕی دەبارێت، هاوکات لە ناوچە سنوورییەکان بەفرێکی کەم دەبارێت. کەشناسی ئاماژەی بەوەش کردووە کە لە کاتەکانی شەودا کاریگەری بارانەکە زیاتر دەبێت و لە هەندێک ناوچەدا بە شێوەی لێزمەباران دەبێت. پلەکانی گەرماش بەراورد بە تۆمارکراوەکانی دوێنێ بە ڕێژەی 3 بۆ 6 پلە نزم دەبنەوە.

سەبارەت بە کەشوهەوای سبەی یەکشەممە رایگەیاند: پێشبینی دەکرێت ئاسمان بە هەوری تەواو بمێنێتەوە و لە کاتەکانی بەیانیدا بارانی مامناوەند ببارێت، پاشان لە کاتەکانی دواتری ڕۆژدا کاریگەرییەکەی لاواز دەبێت و تەنها بە شێوەی نمەبارانی پچڕپچڕ بەتایبەتی لە ناوچەکانی ڕۆژهەڵاتی هەرێم بەردەوام دەبێت. پلەکانی گەرما لەم ڕۆژەدا بەرزبوونەوەیەکی کەم بەخۆیانەوە دەبینن کە لە نێوان 2 بۆ 4 پلە دەبێت بەراورد بە پلەکانی ئەمڕۆ.

بەرزترین پلەکانی گەرما بۆ ئەمڕۆ و سبەی بەم شێوەیەی خوارەوە دەبێت:

هەولێر: ئەمڕۆ 12 - سبەی 14

سلێمانی: ئەمڕۆ  8 - سبەی 10

دهۆک: ئەمڕۆ 9  - سبەی 13

هەڵەبجە: ئەمڕۆ 9  - سبەی 12

چەمچەماڵ: ئەمڕۆ 9  - سبەی 12

زاخۆ: ئەمڕۆ 9 - سبەی 13

سۆران: ئەمڕۆ 6 - سبەی 8

ئاکرێ: ئەمڕۆ 8 - سبەی 11

پیرمام: ئەمڕۆ 6 - سبەی 9

حاجی ئۆمەران: ئەمڕۆ 2 - سبەی 4