زەڵمای خەلیلزاد، باڵیۆزی پێشووی ئەمریکا لە عێراق، لە ڕێگەی هەژماری فەرمیی خۆی لە تۆڕی کۆمەڵایەتی "ئێکس"، هۆشدارییەکی توندی سەبارەت بە سەرهەڵدانەوە و گەشەکردنی گرووپی تیرۆریستی داعش لە سووریا بڵاو کردەوە و چەند پێشنیارێکی بۆ ڕووبەڕووبوونەوەی ئەو مەترسییە خستە ڕوو.
خەلیلزاد ئاماژەی بە ڕاپۆرتێکی "حەمید شەتر" سەرۆکی هەواڵگریی عێراق کردووە و بە "نالەبار" وەسفی کردووە. جەختیشی کردووەتەوە بەردەوامیی شەڕ و پێکدادانەکانی نێوان هێزەکانی حکومەتی سووریا و هێزەکانی سووریای دیموکرات (هەسەدە) بووەتە هۆکارێکی سەرەکی بۆ ئەوەی داعش جارێکی دیکە هێز کۆبکاتەوە و گەشە بکات.
باڵیۆزی پێشووی ئەمریکا بۆ ڕێگری لەم هەڕەشە ئەمنییە، سێ هەنگاوی بەپەلەی پێشنیار کردووە:
١- ئاساییکردنەوەی پەیوەندییەکانی هەسەدە و دیمەشق: خەلیلزاد داوا دەکات حکومەتی سووریا و هەسەدە هان بدرێن بۆ ئاساییکردنەوەی پەیوەندییەکانی نێوانیان، چونکە بە بڕوای ئەو، گرژیی نێوان ئەو دوو هێزە تەنها خزمەت بە ناسەقامگیریی ناوچەکە و بەهێزکردنی داعش دەکات.
٢- چاکسازی لە دامەزراوە ئەمنییەکان: خەلیلزاد جەخت لەوە دەکاتەوە کە پێویستە هێزە ئەمنییە جیاوازەکانی سووریا چاکسازییان تێدا بکرێت و یەک بخرێنەوە، بۆ ئەوەی وڵاتەکە ببێتە خاوەنی دەزگایەکی ئەمنی مۆدێرن و بەهێز کە توانای بەرەنگاربوونەوەی تیرۆری هەبێت.
٣- هەماهەنگیی عێراق و سووریا: خەلیلزاد داوا دەکات ئاستی هاوکاری و سەرپەرشتیارییەکان بۆ هەماهەنگیی زیاتر لە نێوان هێزە ئەمنییەکانی عێراق و سووریا زیاد بکرێت، بە مەبەستی کۆنترۆڵکردنی سنوورەکان و وشککردنی سەرچاوەکانی تیرۆر.
ئەم پەیامەی خەلیلزاد لە کاتێکدایە کە ناوە ناوە ناوچەکانی سووریا و سنوورەکانی عێراق دەبنە گۆڕەپانی هێرشی شانە نوستووەکانی داعش، ئەمەش نیگەرانییەکی زۆری لای ناوەندە نێودەوڵەتییەکان دروست کردووە.
کۆمێنت (0)
تا ئێستا هیچ کۆمێنتێک نەکراوە.