وەزارەتی کارەبای حکوومەتی هەرێمی کوردستان ڕاگەیاندراوێکی بەپەلەی سەبارەت بە دۆخی کارەبای نیشتمانی بڵاوکردەوە و تێیدا ئاماژەی بەوە کردووە کە بەهۆی ئەو شەپۆلە بارانبارین و ڕەشەبا بەهێزەی ڕووی لە ناوچەکانی هەرێمی کوردستان کردووە، زیان بە تۆڕەکانی گواستنەوەی وزە گەیشتووە.
بەپێی ڕاگەیاندراوەکەی وەزارەت، ئەمشەو هەینی کاتژمێر 08:00، بەهۆی توندیی ڕەشەباکەوە گرفت لە هێڵەکانی گواستنەوە و تۆڕەکانی دابەشکردنی کارەبای نیشتمانی دروستبووە. ئەمەش بووەتە هۆی پچڕانی تەزووی کارەبا لە بەشێکی زۆری گەڕەک و ناوچەکانی هەر سێ پارێزگای هەولێر، سلێمانی و دهۆک.
وەزارەتی کارەبا لە پەیامەکەیدا بۆ هاووڵاتییان ڕایگەیاندووە: "لە ئێستادا دۆخەکە لەژێر کۆنترۆڵدایە و هیچ مەترسییەکی گەورە لەسەر سیستەمی گشتیی کارەبا نەماوە." جەختیشیان کردووەتەوە کە تیمە تەکنیکییەکانی چاککردنەوە لە سەرجەم بەڕێوەبەرایەتییەکان خراونەتە حاڵەتی ئامادەباشییەوە و دەستبەجێ چوونەتە شوێنی گرفتەکان بۆ چاککردنەوەی ئەو زیانانەی بەهۆی کەشوهەواکەوە دروستبوون.
سەبارەت بە کاتی گەڕانەوەی کارەبا بۆ ئەو شوێنانەی لێیان بڕاوە، وەزارەت دڵنیایی دەدات کە تیمەکانیان بەردەوامن لە کارکردن و چاوەڕوان دەکرێت لە ماوەی چەند کاتژمێری داهاتوودا سەرجەم گرفتە هونەرییەکان چارەسەر بکرێن و کارەبای نیشتمانی بۆ هەموو ئەو ناوچانە بگەڕێتەوە کە بەهۆی ڕەشەباکەوە بێبەش بوون.
کۆمێنت (0)
تا ئێستا هیچ کۆمێنتێک نەکراوە.