لە هەنگاوێکی بێپێشینەدا، ویلایەتە یەکگرتووەکانی ئەمریکا ڕۆژی سێشەممە 6ی کانوونی دووەمی 2026، پشتیوانیی خۆی بۆ هاوپەیمانییەکی بەرفراوان لە هاوپەیمانانی ئۆکرانیا ڕاگەیاند.
ئەم وڵاتانە کە بە "هاوپەیمانیی خۆبەخشان" دەناسرێن، بەڵێنیان داوە گەرەنتیی ئەمنیی وا پێشکەش بکەن کە شێوەی "پابەندکەری یاسایی" هەبێت بۆ پاراستنی ئۆکرانیا لە ئەگەری هەر هێرشێکی نوێی ڕووسیا لە داهاتوودا.
ئامادەبوونی شاندی باڵای ترەمپ لە پاریس
ئەم کۆبوونەوەیە لە پاریس بە مەبەستی بەهێزکردنی ئەو گەرەنتییانە بوو کە بڕیارە دوای ئاگربەست بە کیێڤ بدرێن. جیاوازیی سەرەکیی ئەم کۆبوونەوەیە لەگەڵ دیدارەکانی پێشوو، ئامادەبوونی نوێنەرانی باڵای ئەمریکا بوو، لەوانە: "ستیڤ ویتکۆف" و "جارێد کۆشنەر" (زاوای دۆناڵد ترەمپ)، شانبەشانی جەنەڕاڵ "ئەلێکسۆس گرینکۆڤیچ" باڵاترین فەرماندەی سەربازیی ئەمریکا لە ئەوروپا.
ویتکۆف کە سەرپەرشتیی گفتوگۆکانی لەگەڵ ڕووسیا کردووە، ڕایگەیاند سەرۆک ترەمپ "بە قورسی لە پشت ئەم پڕۆتۆکۆڵە ئەمنییانە وەستاوە".
ناوبراو لە کۆنگرەیەکی ڕۆژنامەوانیی هاوبەشدا لەگەڵ سەرکردەکانی فەڕەنسا، ئەڵمانیا، بەریتانیا و ئۆکرانیا وتی: "ئەم گەرەنتییانە ئەوەندە بەهێزن کە هاوشێوەیان کەم بینراوە، ئامانجیان ڕێگرییە لە هەر هێرشێکی تری ڕووسیا و ئەگەر هێرشیش کرا، بۆ بەرگری دیزاین کراون."
چاودێریی ئاگربەست بە ڕێبەرایەتی ئەمریکا
بەپێی بەیاننامەی کۆتایی، هاوپەیمانان ڕێککەوتوون لەسەر میکانیزمێکی چاودێری و ڕاستی وەرگرتن (Verification) بە ڕێبەرایەتیی ئەمریکا. بەرپرسان دەڵێن ئەم میکانیزمە پشت بە تەکنەلۆژیای پێشکەوتووی وەک درۆن، هەستەوەر (Sensor) و مانگە دەستکردەکان دەبەستێت، نەک ناردنی هێزی زەمینی ئەمریکی بۆ ناو ئۆکرانیا.
زێلێنسکی: ئەمە نیشانەی ئاسایشێکی ڕاستەقینەیە
ڤۆلۆدیمێر زێلێنسکی، سەرۆککۆماری ئۆکرانیا، لە پەیامێکدا ستایشی ئەم هەنگاوەی کرد و وتی: "ئەمە نیشانەی ئەوەیە کە ئەوروپا و تەواوی هاوپەیمانیی خۆبەخشان تا چەند بۆ بەدیهێنانی ئاسایشێکی ڕاستەقینە ئامادەن." ناوبراو سوپاسی ئەمریکای کرد بۆ ئامادەیی لە پشتیوانیکردن لە هەموو بوارەکاندا، لە گەرەنتی ئەمنییەوە تاوەکو چاودێری ئاگربەست و ئاوەدانکردنەوە.
فەڕەنسا و بەریتانیا سەرباز دەنێرن
لە بەشێکی تری ڕێککەوتنەکەدا، فەڕەنسا و بەریتانیا ئامادەیی خۆیان نیشان داوە بۆ ناردنی هێز دوای جێبەجێبوونی ئاگربەست. ئیمانوێل ماکرۆن ئاماژەی بە ئەگەری ناردنی هەزاران سەربازی فەڕەنسی کرد. "کیر ستارمر" سەرۆک وەزیرانی بەریتانیاش ڕایگەیاند کە ئەمە ڕێگە خۆش دەکات بۆ ئەوەی هێزەکانی بەریتانیا و فەڕەنسا لە خاکی ئۆکرانیادا کار بکەن بۆ دابینکردنی ئاسایشی ئاسمان و دەریا و دووبارە بونیادنانەوەی سوپای ئۆکرانیا.
هەڵوێستی مۆسکۆ
سەرەڕای ئەم هەوڵانە، ڕووسیا تائێستا هیچ ئاماژەیەکی بۆ قبوڵکردنی ڕێککەوتنێکی ئاشتی بەم گەرەنتییانە نیشان نەداوە. مۆسکۆ پێشتر بە توندی دژایەتی هەر جۆرە بوونێکی سەربازیی وڵاتانی ئەندامی ناتۆی لە ناو خاکی ئۆکرانیادا کردووە.
گفتوگۆکان بۆ کۆتاییهێنان بەم شەڕەی کە نزیکەی 4 ساڵە بەردەوامە، لە مانگی تشرینی دووەمەوە خێراییەکی زیاتری بەخۆوە بینیوە، بەڵام هێشتا لایەنەکان لەسەر وردەکارییەکان و مەرجەکانی یەکتر بە تەواوی ڕێکنەکەوتوون.
کۆمێنت (0)
تا ئێستا هیچ کۆمێنتێک نەکراوە.