دوای ئۆپەڕاسیۆنەكەی ڤەنزوێلا و دەستگیركردنی نیكۆلاس مادۆرۆ سەرۆكی ئەو وڵاتە، وەزیری دەرەوەی ئەمریكا هەڕەشەی توندی لە كوپا كرد و جەختی كردەوە كە "واشنتن رژێمی كوبای بەدڵ نییە".
ماركۆ رۆبیۆ وەزیری دەرەوەی ئەمریكا رایگەیاند: حكوومەتی كوبا كێشەی گەورەی دروست كردووە و ئێستا لە تەنگژەدایە، ناشی شارینەوە كە ئێمە رژێمی ئەو وڵاتەمان بەدڵ نییە".
رۆبیۆ ئەو قسانەی لە كۆنگرەیەكی رۆژنامەوانی لە ویلایەتی فلۆریدا گوت و رایگەیاند: حكوومەتی كوبا لەلایەن چەند كەسێكی نەشارەزا و پیر و پەككەوتە بەڕێوەدەبرێت.
سەبارەت بە ئۆپڕاسیۆنی دەستگیركردنی نیكۆلاس مادۆرۆ سەرۆكی ڤەنزوێلا، وەزیری دەرەوەی ئەمریكا گوتی: حكوومەتێكی سیخوڕی پڕ لە كۆكایین بوو و چەند كەسێك دەستیان بەسەر تەواوی وڵاتدا گرتبوو.
ئاماژەی بەوەش دا "ئەگەر من كاربەدەستێكی كوبا بام و ئێستا لە هاڤانا بوومایە، بەلایەنی كەم دەبوو هەست بە ترسێكی گەورە بكەم".
بەرەبەیانی رۆژی شەممەی رابردوو هێزێكی تایبەتی سوپای ئەمریكا ئۆپەڕاسیۆنێكی تۆكمە و نهێنییان لە كۆشكێك لە وڵاتی ڤەنزوێلا ئەنجام دا و تێیدا نیكۆلاس مادۆرۆ سەرۆكی ڤەنزوێلا و هاوسەرەكەیان رفاند.
دوای ئۆپەڕاسیۆنەكە، دۆناڵد ترەمپ سەرۆكی ئەمریكا رایگەیاند كە نیكۆلاس و هاوسەرەكەی بە تۆمەتی ماددەی هۆشبەر و تیرۆر لە دادگایەكی فیدڕالی لە نیۆیۆڕك دادگایی دەكرێن. جەختیشی كردەوە كە وڵاتەكەی ڤەنزوێلا بەڕێوەدەبات تاكو سەرۆكێك بۆ وڵاتەكە بەشێوەی ئاشتی دادەنرێت.
کۆمێنت (0)
تا ئێستا هیچ کۆمێنتێک نەکراوە.