شارەزایەكی كەشناسی ئاشكرای دەكات كە ئەمشەو ساردترین شەوی زستانی ئەمساڵ دەبێت، ئاماژە بەوەش دەكات كە سبەی چوارشەممە شەپۆڵێكی دیكەی بەفر و بارانبارین لە هەرێمی كوردستان دەست پێ دەكاتەوە.
هەڤاڵ سدیق گەڵۆزی شارەزای كەشناسی رایدەگەیەنێت: ئەمشەو دار و بەرد دەیبەستێت و دیاردەی شەختە لە تەواوی ناوچەکان ڕوو دەدات و پلەکانی گەرما لەژێر سفڕی سیلیزی دەبن، واتە ئەمشەو ساردترین شەوی زستانی ئەمساڵ دەبێت.
راشیگەیاند: پیشبینی دەکرێت لەسبەینێ چوارشەممەوە دووبارە شەپۆڵێکی دیكەی بەفر و بارانبارین سەرجەم ناوچه جیاوازەکان بگرێتەوە.
هەروەها رایگەیاند: سەرەتا شەپۆڵەكە پارێزگای دهۆک و ئیدارەی زاخۆ دەست پێ دەکات، لە كاتی ئێوارەدا دەگاتە هەولێر و سۆران.
ئاماژەی بەوەش دا: كاریگەری شەپۆڵەكە رۆژی پێنجشەممە فراوانتر دەبێت و دەگاتە ناوچە شاخاوییەکانی سلێمانی و ڕاپەڕین و هەڵەبجە و ئەگەری بەفربارین و بارانی مامناوەند و بەخوڕ هەیە، هەروەها لە هەولێر و کەرکووک و گەرمیانیش باران دەبارێت.
شارەزاكەی كەشناسی جەختیشی كردەوە كە ڕۆژی هەینی كاریگەری شەپۆڵەکە كۆتایی دێت.
کۆمێنت (0)
تا ئێستا هیچ کۆمێنتێک نەکراوە.