بە بۆنەی پشووەکانی سەری ساڵەوە، بەڕێوەبەرایەتیی گشتیی کاروباری مین لە هەولێر داوا لە هاووڵاتییان و گرووپە شاخەوانییەکان دەکات، بۆ سەلامەتییان نزیکی ناوچە مەترسیدارەکان و کێڵگە مینڕێژکراوەکان نەکەونەوە.
بەڕێوەبەرایەتیی گشتیی کاروباری مین لە هەولێر، بە بۆنەی ڕاگەیاندنی پشووەکانی سەری ساڵەوە، پەیامێکی ئاراستەی هاووڵاتییانی سنووری پارێزگای هەولێر و ئیدارەی سەربەخۆی سۆران کرد.
لە پەیامەکەدا هاتووە: "بەهۆی پشووەکانی سەری ساڵەوە کە هاووڵاتییانمان بۆ بەسەربردنی کاتەکانیان ڕوو لە ناوچە شاخاوییەکان دەکەن و لەبەر ئەوەی بەفر لە زۆربەی چیاکان داباریوە، داوا لە هاووڵاتییان و گرووپە شاخەوانییەکان دەکەین لە کاتی گەشت و خۆشیی گەشتی شاخەوانیدا، نزیکی ناوچە مەترسیدارەکان و کێڵگە مینڕێژکراوەکان نەکەونەوە و خۆیان و کەسوکاریان بپارێزن".
هەروەها داوایان لە هاووڵاتییان کرد، لەکاتی بوونی مەترسیی (مین و پاشماوەی تەقەمەنیی جەنگی) و بۆ وەرگرتنی ڕێنماییی پێویست، یان بینینی هەر پارچەیەکی تەقەمەنی، بە تایبەتی مین، دەتوانن ڕاستەوخۆ پەیوەندی بە هێڵی گەرمی دەزگای مین، ژمارە (182) بکەن، کە بە بێبەرامبەر و لە 24 کاتژمێردا هێڵەکە کراوەیە بۆ خزمەتی هاووڵاتییان.
لە کۆتایی پەیامەکەدا بەڕێوەبەرایەتیی گشتیی کاروباری مین ڕایگەیاندووە، تیمەکانی فریاگوزاری و شارەزایانی بواری هەڵگرتنەوەی مین و تەقەمەنی ئامادەکراون بۆ بەهاناوەچوونی هاووڵاتییان لە کاتی پێویستدا.
کۆمێنت (0)
تا ئێستا هیچ کۆمێنتێک نەکراوە.