پلاندانانی عێراق: داهاتی خێزان مانگانه‌ له‌ 700 هه‌زار دینار كه‌متر بێت به‌ هه‌ژار داده‌نرێت

ئەمڕۆ چوارشەممە وەزارەتی پلاندانانی عێراق پۆلێنکردنی خێزانەکانی پارێزگاكانی عێراق وەک هەژار بەگوێرەی داهاتی مانگانەیان ده‌خاته‌ روو و ده‌ڵێت، به‌گوێره‌ی ئه‌و پلانه‌ی له‌ ماوه‌ی رابردوو كاریان له‌سه‌ری كردووه‌ رێژەی هەژاری لە 23٪ بۆ 17.5٪ دابەزیوە.  

لای خۆیه‌وه‌،عەبدولزەهرە هینداوی گوتەبێژی وەزارەتی پلاندانانی عێراق بە ئاژانسی هەواڵی عێراقی راگەیاندووه‌: هێڵی هەژاری بۆ هەر تاکێک به‌ پێی ئه‌و پێوه‌ره‌ی كه‌ دانراوه‌ 137 هەزار دینارە لە مانگێکدا.

روونیشیکردەوە: "ئەگەر داهاتی تاک لەو بڕە زیاتر بێت ئەوا بە هەژار هەژمار ناکرێت".

گوته‌بێژی پلاندانانی عێراق راشیگه‌یاند: وەزارەت هێڵی ناوەند و هێڵی هەژاری بۆ خێزان به‌ گوێره‌ی واقیع دیاریده‌كات، بۆ نموونە ئەگەر ژمارەی ئەندامانی خێزانێک 5 کەس بێت، ئەوا ئەنجامی لێکدانی 137هەزار لە 5، دەکاتە نزیکەی 700 هەزار دینار، کە ئەمەش هێڵی هەژارییە بۆ خێزان نەک تاک".

 ئاماژەی بەوەش کردووه‌: " به پێی‌ پێوه‌ره‌كان ئەگەر داهاتی خێزانەکە کەمتر بێت لە 700 هەزار دینار لە مانگێکدا، ئەوا وەک خێزانێکی هەژار پۆلێن دەکرێت".

جەختیشیکردەوە: "ئەو خێزانەی داهاتیان لە 700 هەزار دینار زیاتر بێت بە هەژار دانانرێن و گوتیشی: ئەمە پێوەری پێوانەکردنی هەژارییە، چونکە داهات بەگوێرەی پێداویستییەکانی ژیان دەپێورێت کە بریتین لە خۆراک، تەندروستی، پەروەردە و ئەو پێداویستییە سەرەکییانەی مرۆڤ لە ژیانی رۆژانەیدا پێویستی پێیەتی.

هینداوی ئاماژەی بەوەشکردووه‌: "ستراتیژی بەرەنگاربوونەوەی هەژاری لە ماوەی سێ ساڵی رابردوودا سه‌ركه‌وتوو بووه‌ بەجۆرێک رێژەی هەژاری لە 23٪ بۆ 17.5٪ دابەزیوە، ئەم ستراتیژەش تۆڕی پاراستنی کۆمەڵایەتی، بەشەخۆراکی مانگانە و پاڵپشتیکردنی هەژارانی لە بوارەکانی پەروەردە و تەندروستیدا لەخۆگرتووه‌.