گوتەبێژی بەرگریی شارستانی سۆران ئاشكرای دەكات كە تەرمێك دۆزراوەتەوە، بەگوێرەی جلوبەرگەكەی بێت گومان دەكرێت تەرمی مامۆستا ئاڤێستا بێت.
رەوەند هاودیانی گوتەبێژی بەرگریی شارستانی سۆران بە (كوردستان تیڤی) راگەیاند: تەرمی ئافرەتێك لە نزیك بێخمە لە سنووری شارۆچكەی خەلیفان دۆزراوەتەوە و تیمەكانمان گەیشتوونەتە شوێنی دۆزینەوەی تەرمەكە.
راشیگەیاند: تیمەكانمان خەریكن تەرمەكە دەگوازنەوە بۆ پزیشكی دادی لە هەولێر.
هەروەها رایگەیاند: بەپێی زانیارییە سەرەتاییەكان و هەروەها ئەو جلوبەرگانەی كە لەبەر تەرمەكەیە، گومان دەكرێت تەرمی مامۆستا ئاڤێستا بێت.
گوتەبێژی بەرگریی شارستانی سۆران ئاماژەی بەوەش دا كە ئەمانە زانیاری سەرەتایین و تا ئێستا بەتەواوەتی دڵنیا نەبووینەتەوە كە ئەمە تەرمی مامۆستا ئاڤێستا بێت.
چیرۆكی خنكانی مامۆستا ئاڤێستا و نەدۆزرانەوەی تەرمەكەی، كاردانەوەی زۆری لەناو خەڵكی كوردستان و میدیا و تۆڕەكانی كۆمەڵایەتی بەدوای خۆیدا هێنابوو.
ئاڤێستای تەمەن 27 ساڵ لە رێكەوتی 5/4/2025 كەوتە ناو ئاوی تەنگاتور لە دەڤەری بارزان و بێ سەروشوێن بوو، تیمەكانی بەرگریی شارستانی لە رێگەی چەندین شێوازی گەڕان بە بەكارهێنانی هێلیكۆپتەر و درۆنی ژێرئاو و بەلەم و پیادە بۆ ماوەی 90 رۆژ بەبێ پچڕان بەدوای تەرمەكەیدا گەڕان، بەڵام لە كۆتاییدا هەوڵەكان بێ ئەنجام بوون.
کۆمێنت (0)
تا ئێستا هیچ کۆمێنتێک نەکراوە.