سەرۆکی حکوومەت بەردی بناغەی کارگەیەکی گەورە لە کوردستان دادەنێت

سەرۆکی حکوومەتی هەرێمی کوردستان بەردی بناغەی کارگەی تەکنەلۆژیای زێڕین2  دادەنێت کە تایبەتە بە بەرهەمهێنانی مۆبایل و ئامێرە ئەلیکترۆنییەکان.

ئەمڕۆ چوارشەممە 26ـی تشرینی دووەمی 2025، مەسرور بارزانی، سەرۆکی حکوومەتی هەرێمی کوردستان بەردی بناغەی کارگەی تەکنەلۆژیای زێڕین 2 دادەنێت.

کارگەکە بە هاوکاریی شارەزایان و ئەندازیارانی چینی دادەمەزرێت بەڵام 97٪ی دەستی کاری کارگەکە لە هێزی خۆماڵیی کوردستان دەبێت و لە قۆناغی یەکەمی کارکردنیدا توانای بەرهەمهێنانی ڕۆژانە 5 هەزار مۆبایلی دەبێت.

ئەم کارگەیە دووهەم کارگەی بەرهەمهێنانی مۆبایلە کە لە هەرێمی کوردستان دادەمەرزێت و بەم شێوەیە کوردستان دەبێتە گەورەترین بەرهەمهێنەری ئامێری مۆبایل لە رۆژهەڵاتی ناوەڕاستدا.

کارگەی یەکەم ساڵی 2024 بە هەوڵی سەرمایەدارێکی کورد و بە پشتیوانیی کۆمپانیای ئینفینێسکی چینی دروست کرا. کەرەستەکانی ئەم کارگەیە لە چینەوە هاوردە دەکرێن بەڵام دەستی کاری ناوخۆیی کارگەکە بەڕێوە دەبات.