نێردەی تایبەتی ئەمریکا بۆ عێراق ڕایگەیاند، بەم نزیکانە سەردانی عێراق دەکات و لەگەڵ سەرکردە سەرەکییەکان کۆ دەبێتەوە. هەروەها جەختی لەوە کردەوە کە ئەمریکا چاودێریی پڕۆسەی پێکهێنانی حکوومەتی نوێی عێراق دەکات و ڕێگە بە هیچ دەستتێوەردانێکی دەرەکی نادات.
مارک ساڤایا، نێردەی تایبەتی ئەمریکا بۆ عێراق لە پەیامێکدا کە لە تۆڕی "ئێکس" بڵاوی کردووەتەوە، ئاماژەی بەوەدا: "چاوەڕێی ئەوەم کە بەم نزیکانە سەردانی عێراق بکەم و لەگەڵ سەرکردە سەرەکییەکان کۆببمەوە".
هەروەها گوتی: "عێراق لە ماوەی سێ ساڵی ڕابردوودا پێشکەوتنی بەرچاوی بەدەست هێناوە و هیوادارین لە مانگەکانی داهاتوودا ئەم پێشکەوتنە بەردەوام بێت. لە هەمان کاتدا، بە وردی چاودێریی پڕۆسەی پێکهێنانی حکوومەتی نوێ دەکەین".
جەختیشی لەسەر هەڵوێستی ئەمریکا کردەوە و ڕایگەیاند: "با ڕوون بێت کە ویلایەتە یەکگرتووەکانی ئەمریکا هیچ دەستتێوەردانێکی دەرەکی لە شێوەدانی حکوومەتی نوێی عێراق قبووڵ ناکات و ڕێگەی پێ نادات".
کۆمێنت (0)
تا ئێستا هیچ کۆمێنتێک نەکراوە.