یەکێتیی زانایانی ئایینی ئیسلامی کوردستان ڕایگەیاند، بەشداری کردن لە هەڵبژاردن ئەرکێکی ئایینی و نەتەوەییە، بەتایبەت لە ناوچە کوردستانیەکانی دەرەوەی ئیدارەی هەرێم.
ڕۆژی دووشەممە، 10ـی تشرینی دووەم، یەکێتیی زانایانی ئایینی ئیسلامی کوردستان، ڕایگەیاند: ''هەڵبژاردن پرۆسەیەکی گرنگە بۆ نوێکردنەوە و ئیدارەدانی وڵات و پاراستنی بەرژەوەندییەکانی خەڵک، بۆیە ئەمانەت و بەرپرسیارێتییەکی گەورەیە و چەند بە پاکی و رێکوپێکی و بێ فڕوفێڵ بەڕێوە بچێت هەر کەمە''.
لە ڕاگەیەندراوەکەدا هاتووە: بە پێی واقع پێگەی کوردستان لەناو گۆڕەپانی سیاسیی عێراق چەند بەهێز بێت، زیاتر توانای بەرگری و داکۆکیکردن لە مافە دەستووری و نەتەوەییەکانی دەبێت.
یەکێتیی زانایان ڕاشیگەیاند: بەشداری بەرفراوان و کارای هاووڵاتیان لە چوارچێوەی بنەما شەرعی و یاسایی و لەبەرچاوگرتنی بەرژەوەندی گەل و نیشتمان و کەشێکی ئارام ئەرکێکی ئایینی و نەتەوەییە، بەتایبەت لە ناوچە کوردستانییەکانی دەرەوەی ئیدارەی هەرێم گرنگترە.
لە کۆتایی ڕاگەیەندراوەکەدا یەکێتیی زانایان هیواخواستە کە خوای گەورە یارمەتیدەر بێت و ئەم پرۆسەیە بەخێر بۆ کوردستان بگەڕێتەوە و ئارامی و ئاوەدانی و تەبایی نێو ماڵی کورد مسۆگەرتر بکات.
کۆمێنت (0)
تا ئێستا هیچ کۆمێنتێک نەکراوە.