هێڵی ئاسمانی ئەی جێت گەشتەکانی لە فڕۆکەخانەی نێودەوڵەتیی سلێمانی دەست پێ دەکات

هێڵی ئاسمانیی ئەی جێت، گەشتە ئاسمانییەکانی لە فڕۆکەخانەی نێودەوڵەتیی سلێمان دەست پێ دەکات و هەفتانە 4 گەشتی لە نێوان سلێمانی و ئەستەنبوڵدا دەبێت.

ئەمڕۆ چوارشەممە 5ـی تشرینی دووەمی 2025م بەشی پەیوەندییە گشتییەکان و ڕاگەیاندنی فڕۆکەخانەی نێودەوڵەتیی سلێمانی ڕایگەیاند: بەپێی ئەو خشتەیەی کە لەلایەن "هێڵی ئاسمانی ئەی جێت"ەوە بۆ فڕۆکەخانەی نێودەوڵەتی سلێمانی نێردراوە، وا بڕیارە لە لە 3ـی کانوونی یەکەمەوە گەشتە ئاسمانییەکانیان لە نێوان (ئەستەنبول-سلێمانی-ئەستەنبول) هەفتانە بە 4 گەشت دەست پێ بکەن.

ڕۆژی یەکشەممە 2ـی تشرینی دووەمی 2025، دوای نزیکەی دوو ساڵ و نیو لە داخستنی ئاسمانی تورکیا بە ڕووی فڕۆکەخانەی نێودەوڵەتیی سلێمانیدا، شەوی ڕابردوو گەشتە ئاسمانییەکان دەستی پێ کردەوە.

مانگی ڕابردوو لەسەر داوای نێچیرڤان بارزانی، سەرۆکی هەرێمی کوردستان، ڕەجەب تەیب ئەردوغان بڕیاری دا گەمارۆی سەر فڕۆکەخانەی سلێمانی هەڵبگرێت و دووبارە گەشتە ئاسمانییەکان لە سلێمانییەوە بەرەو تورکیا و ئەوروپا و بە پێچەوانەوە دەست پێ بکاتەوە.

سەرۆکی هەرێمی کوردستان لە ڕۆژی 9ی تشرینی یەکەمی 2025، سەرۆکی هەرێمی کوردستان سەردانی تورکیای کرد و لەگەڵ ڕەجەب تەیب ئەردوغان، سەرۆککۆماری تورکیا کۆبووەوە. لە کۆبوونەوەکەدا نێچیرڤان بارزانی داوای لە ئەردوغان کرد، گەمارۆکانی سەر فڕۆکەخانەی سلێمانی هەڵبگیرێن و ڕەزامەندیی ئەردوغانی بۆ ئەم مەبەستە وەرگرت.

دانا محەممەد بەرپرسی ڕاگەیاندنی فڕۆکەخانەی سلێمانییش پشتڕاستی کردبووەوە لە پاش گفتوگۆی نێچیرڤان بارزانی لەگەڵ ڕەجەب تەیب ئەردوغان، بڕیار لەسەر لابردنی گەمارۆکانی سەر فڕۆکەخانەی سلێمانی دراوە.