بکوژی گەنجەکەی دوێنێ شەوی هەولێر دانی بە تاوانەکەیدا نا 

بەڕێوەبەرایەتیی پۆلیسی پارێزگای هەولێر ڕایگەیاند بکوژی ئەو گەنجەی دوێنێ شەو لە هەولێر کوژرا، دوای لێکۆڵینەوەیەکی ورد دانی بە تاوانەکەیدا ناوە.
ڕۆژی دووشەممە، 27ـی تشرینی یەکەم، بەڕێوەبەرایەتیی پۆلیسی پارێزگای هەولێر ڕایگەیاند: دوای ئەوەی شەوی ڕابردوو لە رووداوێکی كوشتن له ناوبازاڕی شاری هەولێر ئاگادار کراینەوە، دەستبەجێ تیمەکانمان گەیشتنە شوێنی ڕووداو و دەستیان بە لێکۆڵینەوە کرد.
لە ڕاگەیەندراوەکادا هاتووە: پاش لێکۆڵینەوەیەکی ورد و بەدواداچوونێکی چڕ، دەرکەوت لەسەر کێشەیەکی کۆنی نێوانیان بووە و بکوژ دانی پێدا ناوە. گوایە کەسی کوژراو، مۆبایلی بکوژی هاک کردووە و کۆمەڵێک وێنەی بردووە، بۆیە شەوی ڕابردوو بکوژ بە ناوی آ. ھ. ح بە چەکێکی جۆری دەمانچە هاوڕێکەی بە ناوی ی. د. ع دەکوژێت.
بەڕێوەبەرایەتیی پۆلیسی پارێزگای هەولێر ڕاشیگەیاند: لە هەمان کاتی ڕووداوەکەدا تیمەکانمان لە بەشی پۆلیسی نەهێشتنی تاوان سەر بە بەڕێوەبەرایەتیی پۆلیسی پارێزگای هەولێر تۆمەتباری بکوژیان دەستگیر کرد و لێکۆڵینەوەش لە ڕووداوەکە بەردەوامە.