حكوومەتی هەرێمی كوردستان مژدەیەكی دیكە پێشكەش بە خەڵكی سنووری مەخموور و ناوچەكانی دەوروبەری دەكات ئەویش كردنەوەی مامەڵەی لێدانی بیری ئیرتیوازییە بۆ جوتیارانی ناوچەكە.
سەنگەر كانەبی بەرپرسی لقی 23ی قەرەچووخ تایبەت بە (كوردستان تیڤی) مژدەكەی گەیاندە جوتياران و گوندنشينان و رایگەیاند: بە هەوڵەكانی لقی 23ی قەرەچووخی پارتی ديموكراتی كوردستان و بە هەماهەنگی پارێزگای هەولێر، ئەمڕۆ ئێوارە بڕياری حكوومەتی هەرێمی كوردستانمان گەڕاندەوە بۆ جوتيارانی سنووری شارۆچكەی مەخموور و شارەدێكانی مەلاقەرە و كەندێناوه و گوێڕ و قەراج، ئەويش لێدانی بيری ئیرتیوازییە لە زەوییە كشتوكاڵییەكانی سنوورەكە.
سەنگەر كانەبی هەروەها رایگەیاند: لە سبەی دووشەممە رێكەوتی 27/10/2025 جوتيارانی مەخموور و مەلاقەرە و كەندێناوه و گوێڕ و قەراج، دەتوانن مامەڵەی لێدانی بیری ئیرتیوازی لە زەوییە كشتوكاڵییەكانیان ئەنجام بدەن و بیخەنە بەردەستی ئیدارەی سنوورەكە.
راشیگەیاند: لێدانی بیری ئیرتیوازی بە ڕێكار و ڕێنمايیەكانی بەڕێوەبەرایەتیی ئاوی ژێرزەوی سەر بە پارێزگای هەولێر ئەنجام دەدرێت.
بەرپرسی لقی 23ی قەرەچووخ جەختیشی كردەوە كە جوتیارانی شارۆچكەی مەخموور و شارەدێكانی دەوروبەری دەتوانن لە سبەینێوە مامەڵەكانیان پێشكەش بكەن بۆ ئەوەی لەم بڕیارە سوودمەند بن.
مەخموور/ كارزان كاكل
کۆمێنت (0)
تا ئێستا هیچ کۆمێنتێک نەکراوە.