ئەمشەو چوارشەممە تەقینەوە لە بنكەیەكی پۆلیس لە سنووری پارێزگای بەغدا ڕووی دا و بەهۆیەوە پۆلیسێك گیانی لەدەست دا و 3ی دیكەش بریندار بوون.
بەگوێرەی زانیارییەكان، تەقینەوەكە بەهۆی بۆڕییەكی غاز لە كاتی كاركردندا لەناو بنكەی پۆلیسی وزە لە گەڕەكی ئیبراهیم بن عەلی لە باشووری بەغدا كەوتۆتەوە و بەهۆیەوە ئاگرێكی گەورەش لە بنكە پۆلیسەكە دروستبووە.
لە ئەنجامی تەقینەوەكەدا پۆلیسێك گیانی لەدەستداوە و 3ی دیكەش بریندار بوون، هەروەها سێ ئۆتۆمبێلی بنكە پۆلیسەكە سوتاون.
لای خۆیەوە وەزارەتی ناوخۆی عێراق لە راگەیەنراوێكدا گیانلەدەستدانی پۆلیسەكەی بنكەی پۆلیسی وزە و برینداربوونی سێی دیكەی پشتڕاستكردەوە و رایگەیاند: رووداوەكە بەهۆی كێشەیەكی هونەری دروستبووە و ئاگر كەوتۆتەوە.
تیمەكانی بەرگریی شارستانیی بەغدا گەیشتوونەتە شوێنی رووداوەكە و خەریكی كۆنتڕۆڵكردنی ئاگرەكەن.
کۆمێنت (0)
تا ئێستا هیچ کۆمێنتێک نەکراوە.