نەتانیاهۆ: لە سەرەتاوە ڕوونم کردبووەوە تا هەموو بارمتەکانمان نەگەڕێنەوە ئێمە ئارام ناگرین

سەرۆکوەزیرانی ئیسرائیل ڕۆژی ڕێککەوتنی نێوان ئیسرائیل و حەماسی وەک ڕۆژێکی گەورە بۆ ئیسرائیل ناو برد و رایگەیاند هەر لە سەرەتاوە ڕوونم کردبووەوە تا هەموو بارمتەکانمان نەگەڕێنەوە و هەموو ئامانجەکانمان بەدەست نەهێنین، ئێمە ئارام ناگرین.

بنیامین نەتانیاهۆ، سەرۆکوەزیرانی ئیسرائیل دوای راگەیاندنی ڕێککەوتن لەگەڵ حەماس لە تۆڕی کۆمەڵایەتیی ئێکس نووسیی: "من سوپاسی سەربازانی قارەمانی سوپای ئیسرائیل و هەموو هێزە ئەمنییەکان دەکەم کە بە هۆی ئازایەتی و لەخۆبوردوویی ئەوانەوە گەیشتینە ئەم ڕۆژە". ڕاشیگەیاند رۆژی پێنجشەممە، بە مەبەستی پەسندکردنی ڕێککەوتنەکە و گەڕاندنەوەی بارمتەکان، ئەندامانی کابینە کۆ دەکاتەوە.

ئاماژەی بەوەش کردووە: "بە پەسەندکردنی قۆناغی یەکەمی پلانەکە، هەموو بارمتەکانمان دەگەڕێندرێنەوە ماڵەوە. ئەمە سەرکەوتنێکی دیپلۆماسی و سەرکەوتنێکی نیشتمانی و ئەخلاقییە بۆ دەوڵەتی ئیسرائیل".

نەتانیاهۆ هەروەها سوپاسی دۆناڵد ترەمپ، سەرۆکی ئەمریکا و تیمەکەی کردووە کە بۆ گەیشتن بەم ڕێککەوتنە و ئازادکردنی بارمتە ئیسرائیلییەکان، هەموو هەوڵەکانی خۆیان خستە گەڕ. جەختیشی کردووەتەوە هەمووان پێکەوە بۆ گەیشتن بە هەموو ئامانجەکانیان و پەرەپێدانی ئاشتی لەگەڵ دراوسێکانی ئیسرائیل، لە هەوڵەکانیان بەردەوام دەبن.

هاوکاتیش ئیسحاق هێرتزوک، سەرۆککۆماری ئیسرائیل لە تۆڕی کۆمەلایەتیی ئێکس نووسیی: "لەم کاتەدا هەموو خەڵکی ئیسرائیل لەگەڵ بارمتەکانن. هەموو خەلکی ئیسرائیل لەگەڵ بنەماڵەکانن. ئەوان لە وڵاتی دوژمن دەگەڕێنەوە ... کوڕەکانمان دەگەڕێنەوە وڵاتی خۆیان".