وەزارەتی دارایی و ئابووری ڕایگەیاند، سبەی دووشەممە، مووچەی مانگی تەمووزی مامۆستایانی گرێبەست و هەروەها دوو مووچەی بەشێک لە فەرمانبەرانی هەمیشەیی و گرێبەست دابەش دەکات. وەزارەتەکە ئاشکرای کرد، شایستە داراییەکان لەسەر داهاتی ناوخۆ خەرج دەکرێن.
ئەمڕۆ یەکشەممە، 5ـی تشرینی یەکەمی 2025، وەزارەتی دارایی و ئابووریی حکوومەتی هەرێمی کوردستان، لە ڕاگەیێندراوێکدا وادەی دابەشکردنی مووچەی چەند توێژێکی ڕاگەیاند.
بەگوێرەی ڕاگەیێندراوەکە، ڕۆژی دووشەممە، 6ـی تشرینی یەکەم، مووچەی مانگی تەمووزی مامۆستایانی گرێبەستی سەر بە وەزارەتەکانی پەروەردە و خوێندنی باڵا و توێژینەوەی زانستی دابەش دەکرێت.
هاوکات، مووچەی مانگەکانی تەمووز و کانوونی دووەمی 2025ـی سەرجەم ئەو فەرمانبەرانەش دابەش دەکرێت، کە لەدوای 1-7-2024ـەوە بە شێوەی هەمیشەیی و گرێبەست لەسەر میلاکی دامەزراوەکانی حکوومەتی هەرێم دامەزراون.
وەزارەتی دارایی ڕوونیکردووەتەوە، شایستە داراییەکانی ئەم توێژانە لەسەر داهاتی ناوخۆی هەرێمی کوردستان خەرج دەکرێن.
کۆمێنت (0)
تا ئێستا هیچ کۆمێنتێک نەکراوە.