سەرۆكی ئەمریكا رایگەیاند، دوای تێپەڕبوونی 3000 ساڵ، بە ئاسانی كێشەكانی رۆژهەڵاتی ناوەڕاست چارەسەر دەكەن، جەختیشی كردەوە كە دوای غەزە، كێشە و ململانێی دیكەی جیهان كۆتایی پێ دەهێنن.
دۆناڵد ترەمپ سەرۆكی ئەمریكا لە چاوپێكەوتنێكدا بۆ ئاژانسی (وەن ئەمریكا)ی گوتوویەتی: ئەوەی من كردووە تا ئێستا هیچ كەسێكی دیكە پێی نەكراوە، لە ماوەی چەند مانگێكدا توانیمان حەوت جەنگ رابگرین و رەنگە بەمزووانە بیكەین بە 8 جەنگ.
هەروەها گوتوویەتی: دوای تێپەڕبوونی 3000 ساڵ، دەتوانرێت كێشەی رۆژهەڵاتی ناوەڕاست بە ئاسانی چارەسەر بكرێت.
سەرۆكی ئەمریكا ئاماژەی بەوەشداوە: دوای كۆتاییهێنان بە جەنگی غەزە، زۆر شتی دیكەش لەبەردەممان دەمێنێت بۆ ئەوەی ئەنجامی بدەین.
ترەمپ راشیگەیاندووە: ئەگەر رێككەوتن لەسەر راگرتنی جەنگ بكرێت، ئەوا غەزە و لە هەمانكاتیشدا ئاشتیش بەدەست دەهێنین، بێگومان ئەمە دەبێتە دەستكەوتێكی گەورە و مێژوویی.
سەرۆكی ئەمریكا جەختیشی كردەوە كە دوای چارەسەركردنی كێشەی غەزە، بۆ چارەسەركردنی كێشەی رووسیا و ئۆكڕاینا هەوڵەكان دەستپێدەكەینەوە. دانی بەوەش دانا كە چارەسەركردنی كێشەی رووسیا و ئۆكڕاینا زەحمەت و ئاڵۆزە، لە كاتێكدا كە پێشتر وای دەزانی ئاسانە.
رۆژی دووشەممەی رابردوو دۆناڵد ترەمپ سەرۆكی ئەمریكا و بنیامین نەتانیاهۆ سەرۆكی ئیسرائیل پلانی راگرتنی جەنگیان لە غەزە راگەیاند، داواش لە بزووتنەوەی حەماس كرا لە ماوەی 3 بۆ 4 رۆژ وەڵامی پلانەكە بدەنەوە.
کۆمێنت (0)
تا ئێستا هیچ کۆمێنتێک نەکراوە.