جێگری سەرۆكی ئەنجوومەنی نوێنەرانی عێراق پیرۆزبایی لە سەرجەم كەسوكاری شەهیدان و ئەنفالكراوانی كەركووك و ناوچەكانی دەرەوەی ئیدارەی هەرێم كرد بەبۆنەی دەرچوونی بڕیاری سوودمەندبوونیان لە چەندین ماف و ئیمتیاز هاوشێوەی كەسوكاری شەهیدان و ئەنفالكراوانی عێراق.
دەزگای شەهیدانی عێراق بە نووسراوێكی فەرمی بڕیاری دا، سەرجەم ئەو مافانەی بە كەسوكاری شەهیدان و ئەنفالكراوانی عێراق دراوە، كەسوكاری شەهیدان و ئەنفالكراوانی دانیشتووی دەرەوەی ئیدارەی هەرێمی كوردستانیش بگرێتەوە.
شاخەوان عەبدوڵا جێگری سەرۆكی ئەنجوومەنی نوێنەرانی عێراق بۆ ئەم مەبەستە پیرۆزبایی لە سەرجەم کەسوکاری شەهیدان و ئەنفالكراوانی کەرکووک و تەواوی ناوچەکانی دەرەوەی ئیدارەی هەرێمی كوردستان كرد بە بۆنەی دەركردنی ئەم بڕیارەوە.
شاخەوان عەبدوڵا جەختیشی كردەوە كە سەرجەم بڕیار و مافەكان چوونەتە بواری جێبەجێكردنەوە و گشتاندنیان بۆ كراوە.
جێگری سەرۆكی ئەنجوومەنی نوێنەرانی عێراق ئاماژەی بەوەش دا: پشتیوان بە خودای گەورە بەهەمانشێوە رێنمایی جێبەجێکردنی گەڕانەوەی زەوییەکان و زیندانی سیاسی و هەڵبجە و هەموو ئەو یاسانەی ئێمە لەم خولەی پەرلەمانی عێراق دەرمان چواند، لێرە بڵاو دەکەینەوە.
بەگوێرەی بڕیارەكەی دەزگای شەهیدانی عێراق، بۆ لەمەدوا كەسوكاری شەهیدان و ئەنفالكراوانی دانیشتووی دەرەوەی ئیدارەی هەرێمی كوردستان لە چەندین ماف و ئیمتیاز سوودمەند دەبن، لەوانە بەخشین لە باج و گواستنەوەی فەرمانگە و وەرگرتن لە خوێندنی باڵا و درێژكردنەوەی ماوەی خانەنشینی و وەرگرتنی چارەسەری نەخۆشی لە دەرەوەی وڵات.
هەر لە نووسراوەكەی دەزگای شەهیدان ئاماژەی بەوەشدراوە كە ئەو ماف ز ئیمتیازاتانە هەریەك لە (دایك و باوك و منداڵان، هاوژین، خوشك و برا، منداڵی كوڕ و كچ)ی شەهیدان و ئەنفالكراوان لێی سوودمەند دەبن.
وێنە: نووسراوی دەزگای شەهیدانی عێراق بۆ سوودمەندبوونی كەسوكاری شەهیدان و ئەنفالكراوانی كوردستان:-
کۆمێنت (0)
تا ئێستا هیچ کۆمێنتێک نەکراوە.