دوو تۆمەتبار دوای ئەوەی تەقە لە ماڵی هاووڵاتییەک دەکەن لەلایەن ئاسایشی سلێمانییەوە دەستگیر دەکرێن. ئاسایشی سلێمانی ڕایگەیاند، چەکی بێ مۆڵەتیان پێ بووە و دەستی بەسەردا گیراوە.
ئەمڕۆ سێشەممە 30ـی ئەیلوول، ئاسایشی سلێمانی بڵاوی کردەوە، شەوی یەکشەممە لە گەڕەکی شێخ محێدینی شاری سلێمانی دوو کەس تەقەیان لە ماڵی هاووڵاتییەک کرد و دوای ئەنجامدانی تاوانەکە هەڵاتن.
ئاسایشی سلێمانی دەڵێت، دوای ئەوەی ئاگادار کراینەوە و چووینە شوێنی ڕووداوەکە و لێکۆڵینەوە و بەدواداچوونمان ئەنجام دا، توانیمان لە ماوەی کەمتر لە دوو ڕۆژ دەستگیریان بکەین.
ئاسایشی سلێمانی ئاماژەی بەوە کردووە، تۆمەتباران چەکی بێ مۆڵەتیان پێبووە و دەستی بەسەردا گیراوە. تۆمەتباران بە ماددەی 31-405 ڕاگیران و لێکۆڵینەوە لە دۆسیەکەیان بەردەوامە.
کۆمێنت (0)
تا ئێستا هیچ کۆمێنتێک نەکراوە.