پارێزگای هەولێر ڕایگەیاند، کارکردن لە پڕۆژەی دووسایدی گۆمەسپان - سماقوڵی بەردەوامە و بەشێکی پڕۆژەکە کە درێژییەکەی 22 کیلۆمەترە، تەواو بووە. پڕۆژەکە کە هەردوو پارێزگای هەولێر و سلێمانی پێکەوە دەبەستێتەوە، بڕیارە مانگی داهاتوو ئەو بەشەی بکرێتەوە.
ئەمڕۆ دووشەممە 29ـی ئەیلوول، پارێزگای هەولێر لە ڕاگەیێندراوێکدا بڵاوی کردەوە، لەسەر فەرمان و ڕاسپاردەی مەسرور بارزانی، سەرۆکی حکومەتی هەرێمی کوردستان، کارکردن لە پڕۆژەی دووسایدی گۆمەسپان - سماقوڵی بە چڕی بەردەوامە.
لە ڕاگەیێندراوەکەدا هاتووە، پڕۆژەکە بە گوژمەی 210 ملیار دینار لەلایەن کۆمپانیای "هێمن گرووپ"ـەوە جێبەجێ دەکرێت و ئامانج لێی پێکەوە بەستنەوەی هەردوو پارێزگای هەولێر و سلێمانییە. هاوکات بەشێکە لە پلانی گەشەپێدانی ناوچەی بەنداوی گۆمەسپان وەک پڕۆژەیەکی ستراتیژیی گەشتیاری و ئابووری.
پارێزگای هەولێر ڕایگەیاندووە، ئەو بەشەی پڕۆژەکە کە تەواو بووە، درێژییەکەی 22 کیلۆمەترە و لە یەکتربڕی گۆمەسپانەوە دەست پێ دەکات و بڕیارە لە ناوەڕاستی مانگی داهاتوودا بە فەرمی بکرێتەوە.
کۆمێنت (0)
تا ئێستا هیچ کۆمێنتێک نەکراوە.