سەرۆکی سووریا، لە گوتارێکدا لە نەتەوە یەکگرتووەکان رایگەیاند، رژێمی پێشوو نزیکەی ملیۆنێک کەسی کوشتووە و دوو ملیۆن خانووی رووخاندووە. شەرع داوای هەڵگرتنی سەرجەم سزاکانی سەر وڵاتەکەی کرد و بەڵێنی دا هەموو ئەوانەی دەستیان بە خوێن سوورە رادەستی دادگا بکات.
رۆژی چوارشەممە 24ـی ئەیلوول، ئەحمەد شەرع، سەرۆکی سووریا داوای هەڵگرتنی سەرجەم سزاکانی سەر وڵاتەکەی کرد و ئاشکرای کرد، رژێمی پێشوو نزیکەی ملیۆنێک کەسی کوشتووە و دوو ملیۆن خانووی رووخاندووە.
شەرع لە گوتارێکیدا لە نەتەوە یەکگرتووەکان گوتی: "سووریا ماوەی 60 ساڵ کەوتە ژێر دەسەڵاتی رژێمێکی دڕندە کە بەهای ئەو خاکەی نەدەزانی کە حوکمی دەکرد، چیرۆکی سووریا پەندێکە لە پەندەکانی مێژوو لە جەنگی نێوان حەق و باتڵدا".
گوتیشی: "رژێمی پێشوو ناشرینترین ئامرازی ئەشکەنجەی دژی گەلەکەمان بەکارهێنا، نزیکەی ملیۆنێک کەسی کوشت و نزیکەی دوو ملیۆن خانووی رووخاند".
هاوکات رایگەیاند: "سووریا بووەتە وڵاتێک کە دەرفەتێک بۆ ئاشتی و گەشەسەندن لە ناوچەکەدا دەڕەخسێنێت".
ئەحمەد شەرع بەڵێنی دا هەموو ئەوانەی دەستیان بە خوێن سوورە، رادەستی دادگا بکات و گوتیشی: "سووریا گفتوگۆ و دیپلۆماسی بەکاردەهێنێت و پابەندبوونی خۆی بە پەیماننامەی کۆتاییهێنان بە پێکدادانەکان دووپات دەکاتەوە".
سەرۆکی سووریا دووبارە داوای کرد کە سەرجەم سزاکان هەڵبگیرێن و جەختی کردەوە: "سووریای ئەمڕۆ خۆی بنیات دەنێتەوە و وڵاتێکی خاوەن شارستانییەتە و شایستەی ئەوەیە ببێتە دەوڵەتی یاسا".
کۆمێنت (0)
تا ئێستا هیچ کۆمێنتێک نەکراوە.