بارەگای بارزانی لە پەیامێكی سەرەخۆشیدا بەهۆی كۆچی دوایی ئیبراهیم گاباری رایدەگەیەنێت "سەرۆك بارزانی بە بیستنی هەواڵی كۆچی دوایی ئەم كەسایەتییە كوردپەروەرەی ڕۆژئاوای كوردستان خەمبار بووە و سەرەخۆشی لە خانەوادە و كەسوكارەكەی دەكات".
لە پەیامەكەی بارەگای بارزانیدا هاتووە "ئیبراهیم گاباری تەمەنێكی دوورودرێژی بۆ خەباتی كوردایەتی لە شۆڕشی ئەیلوول و قۆناغەكانی تری خەباتی گەلەكەمان تەرخان كردبوو، لەو ڕێگەیەشدا ئاوارەیی و زیندان و كوێرەوەرییەكی زۆری بینیوە".
دەقی پەیامە سەرەخۆشییەكەی بارەگای بارزانی بۆ كۆچی دوایی ئیبراهیم گاباری:-
بەناوی خودای مەزن و دلۆڤان
بەداخێكی زۆرەوە هەواڵی كۆچی دوایی تێكۆشەر و خەباتگێڕی كورد (ئیبراهیم گاباری)ـمان پێ گەییشت.
خوالێخۆشبوو ئیبراهیم گاباری كەسایەتییەكی كوردپەروەری ڕۆژئاوای كوردستان بوو كە تەمەنێكی دوورودرێژی بۆ خەباتی كوردایەتی لە شۆڕشی ئەیلوول و قۆناغەكانی تری خەباتی گەلەكەمان تەرخان كردبوو و لەو ڕێگەیەدا ئاوارەیی و ماوەیەكی زۆری زیندان و كوێرەوەری بینیوە و خۆی و خانەوادەكەی كایگەرییەكی زۆریان لەسەر بزووتنەوەی ڕزگاریخوازی كورد لە سووریا هەبووە و نموونەی خەباتگێڕێكی ڕاستەقینە و وەفادار بووە.
جەنابی سەرۆك مەسعود بارزانی كە خوالێخۆشبوو ئیبراهیم گاباری لە چەندین قۆناغی سەختدا لە نزیكەوە ناسیوە، بە بیستنی هەواڵی كۆچی دوایی ئیبراهیم گاباری خەمبار بووە و سەرەخۆشی لە خانەوادە و كەسوكارەكەی دەكات.
بەم بۆنەوە پرسە و هاوخەمیی خۆمان ئاراستەی خانەوادە و دۆستان و ئاشناییانی خوالێخۆشبوو ئیراهیم گاباری و هەموو تێكۆشەر و خەباتگێڕانی ڕۆژئاوای كوردستان دەكەین و خۆمان بە هاوبەشی خەمیان دەزانین.
لە خودای گەورە داواكارین ڕۆحی خواڵێخۆشبوو بە بەهەشتی بەرین شاد بكات و سەبر و ئارامی بە هەموو لایەك ببەخشێت.
انا للە و انا الیە راجعون
بارەگای بارزانی
15ـی ئەیلوولی 2025
کۆمێنت (0)
تا ئێستا هیچ کۆمێنتێک نەکراوە.