پۆلیسی هەڵەبجە رایگەیاند، گەنجێکی تەمەن 17 ساڵیان بە تۆمەتی دزینی دوو ماتۆڕسکیل لە دوو گەڕەکی جیاوازی شارەکە دەستگیرکردووە. پۆلیس دەڵێت، تۆمەتبارەکە لە رێگەی کامێرای چاودێرییەوە ناسراوەتەوە و دانی بە تاوانەکەیدا ناوە.
ئەمڕۆ دووشەممە 15ـی ئەیلوولی 2025، بەڕێوەبەرایەتیی پۆلیسی پارێزگای هەڵەبجە رایگەیاند، دوای ئەوەی دوو هاووڵاتی سکاڵایان تۆمارکردووە کە ماتۆڕسکیلەکانیان لە گەڕەکەکانی شارەوانی و مۆردانە دزراون، هێزەکانی پۆلیسی نەهێشتنی تاوان دەستبەجێ دەستیان بە لێکۆڵینەوە کردووە.
پۆلیسی هەڵەبجە ئاماژەی بەوە کردووە، دوای بەدواداچوون و سوودوەرگرتن لە کامێراکانی چاودێری، توانیویانە تۆمەتبارەکە دەستنیشان بکەن و بە بڕیاری دادوەر دەستگیری بکەن.
تۆمەتبارەکە ناوی (ء. ش. م)ـە و تەمەنی 17 ساڵە و دانیشتووی دەرەوەی سنووری پارێزگای هەڵەبجەیە.
لە کۆتایی راگەیێندراوەکەدا هاتووە، تۆمەتبارەکە لە بەردەم دادوەری لێکۆڵینەوەدا دانی بە تاوانەکەیدا ناوە و بەپێی ماددەی 446ـی یاسای سزادانی عێراقی راگیراوە.
کۆمێنت (0)
تا ئێستا هیچ کۆمێنتێک نەکراوە.