ئاژانسی فیدراڵی رووسیا بۆ پزیشکی و بایۆلۆژی (FMBA) پەرەپێدانی ڤاکسینێکی نوێی شێرپەنجەی راگەیاند، کە قۆناغە تاقیکارییەکانی بە سەرکەوتوویی بڕیوە، لە بواری بەرەنگاربوونەوەی یەکێک لە کوشندەترین نەخۆشییەکانی سهردهم.
ئاژانسه رووسییهكه رایگەیاندووه: زانایان ڤاکسینێکی نوێی شێرپەنجەیان پەرەپێداوە و دوای بڕینی قۆناغە تاقیکارییەکان بە سەرکەوتوویی، ئێستا به تهواوی ئامادەیە بۆ بەکارهێنان.
ڤیرۆنیکا سکڤۆرتسۆڤا سەرۆکی ئاژانسەکە، لە میانی بەشداریکردنی لە دەیەمین کۆڕبەندی ئابووریی رۆژهەڵات لە (ڤلادیڤۆستۆک) رایگەیاند: ڤاکسینە نوێیەکە ناوی "ئینتیرۆمیکس" (Enteromix)ە و پشت بە تەکنیکی ترشی رایبۆزی (MRNA) دەبەستێت، کە هەمان ئەو تەکنیکەیە لە هەندێک ڤاکسینی کۆرۆنادا بەکارهێنرا.
روونیشی کردەوە: ئەم ڤاکسینانە پشت بە ڤایرۆسی لاوازکراو یان لەکارخراو نابەستن، بەڵکو خانەکانی لەش فێردەکەن کە پڕۆتینی دیاریکراو بەرهەمبهێنن کە هانی سیستمی بەرگريی دەدەن بۆ ناسینەوە و هێرشکردنە سەر خانە شێرپەنجەییەکان.
سکڤۆرتسۆڤا گوتیشی: ڤاکسینەکە چەندین ساڵی لە توێژینەوەی زانستیدا بەڕێکردووە، لەنێویاندا 3 ساڵ تاقیکردنەوەی پێش کلینیکیی ناچاری و ئەنجامەکان دەریانخستووە کە سەلامەتە تەنانەت لە کاتی دووبارەکردنەوەی ژەمەکانیشدا، جگە لە کاریگەرییە بەرزەکەی.
دووپاتی کردەوە کە هەندێک لە تاقیکردنەوەکان بچووکبوونەوەی گرێ شێرپەنجەییەکان یان خاوبوونەوەی گەشەکردنیان بە رێژەی نێوان 60% بۆ 80% تۆمارکردووە بەپێی جۆری شێرپەنجەکە، هەروەها باشبوون لە ڕێژەی مانەوە لە ژیاندا لەلایەن ئەو کەسانەی تاقیکردنەوەیان لەسەر کراوە بەدی کراوە.
بەپێی زانیاری ئاژانسە رووسییەکە، سەرنجی سەرەکیی ئەم ڤاکسینە لەسەر شێرپەنجەی قۆڵۆن و ڕیخۆڵەئەستوورە دەبێت کە یەکێکە لە باوترین جۆرەکانی شێرپەنجە.
ئهوهش هاتووه: ئهم دۆزینهوه زانستییه دەرگة بۆ چارەسەری وردتر و کاریگەرتر و کەم زیانتر بۆ نەخۆشانی شێرپهنجه دەکاتەوە، بە بەراورد بە چارەسەری کیمیاییی کلاسيك كه پێشتر گیراوهتهبهر.
کۆمێنت (0)
تا ئێستا هیچ کۆمێنتێک نەکراوە.