لە رووداوێکی هاتوچۆ لەسەر رێگەی قەسروک - مەلابروان لە سنووری شێخان، کەسێک گیانی لەدەست دا و کەسێکی دیکەش بریندار بوو. هاتوچۆی شێخانیش هۆکاری رووداوەکە بۆ لێخوڕینی خێرا و نەبەستانی پشتێنی سەلامەتیی دەگێڕێتەوە.
ئەمڕۆ هەینی 29ـی ئابی 2025، بەڕێوەبەرایەتیی هاتوچۆی شێخان ڕایگەیاند، کاتژمێر 05:00ـی ئێوارە، رووداوێکی هاتوچۆ لەسەر رێگەی ناحیەی قەسروک بۆ گوندی مەلابروان لە سنووری قەزای شێخان روویدا. رووداوەکە لەنێوان دوو ئۆتۆمبێلی جۆری پیکاپ تۆیۆتا و نیسان سێنترا بووە.
هاتوچۆی شێخان گوتی: "لە ئەنجامی پێکدادانی هەردوو ئۆتۆمبێلەکە، خاوەنی ئۆتۆمبێلی نیسان سێنتراکە گیانی لەدەستدا و شۆفێری ئۆتۆمبێلی تۆیۆتاکەش برینداربوو".
لەبارەی رووداوەکەوە ئاماژەی بەوە کردووە، هۆکاری سەرەکیی رووداوەکە بۆ لێخوڕینی خێرا و پابەند نەبوون بە یاساکانی هاتوچۆ دەگەڕێتەوە، هەروەها هەردوو شۆفێرەکە پشتێنی سەلامەتییان نەبەستووە.
بەڕێوەبەرایەتیی هاتوچۆی شێخان ڕایگەیاند، تەرمی قوربانییەکە رەوانەی پزیشکی دادوەری کراوە و بریندارەکەش گەیەندراوەتە نەخۆشخانە بۆ وەرگرتنی چارەسەر.
کۆمێنت (0)
تا ئێستا هیچ کۆمێنتێک نەکراوە.