وەزیری دەرەوەی سووریا ڕایگەیاند وڵاتەکەی بە قۆناغێکی سەخت و پڕ لە ئاڵنگاریدا تێدەپەڕێت و ئاواتەخوازە ڕووسیا لەم بارودۆخەدا پشتیوانیان بێت.
ئەمڕۆ پێنجشەممە، 31ـی تەمووز، ئەسعەد شەیبانی، وەزیری دەرەوەی حکوومەتی کاتیی سووریا، لە میانەی کۆبوونەوەی لەگەڵ سێرگی لاڤرۆڤ، وەزیری دەرەوەی ڕووسیا لە مۆسکۆ، ڕایگەیاند: وڵاتەکەی بە قۆناغێکی سەخت و پڕ لە ئاڵنگاریدا تێدەپەڕێت و ئاواتەخوازە ڕووسیا لەم بارودۆخەدا پشتیوانیان بێت.
وەزیری دەرەوەی سووریا، راشیگەیاند: ''سووریا چاوەڕوانی دامەزراندنی پەیوەندییەکی دروست و پتەوە لەگەڵ ڕووسیا، کە لەسەر بنەمای هاوکاری و ڕێزی دوولایەنە بێت''، هەروەها وتیشی ''هەندێک حکوومەت هەن کار بۆ تێکدانی پەیوەندیی نێوان سووریای نوێ و ڕووسیا دەکەن''
شەیبانی لە کۆبوونەوەکەدا وتیشی: ''ئێمە لێرەین بۆ ئەوەی نوێنەرایەتیی سووریای نوێ بکەین و دەمانەوێت پەیوەندییەکی دروست لەگەڵ مۆسکۆدا دەست پێ بکەین و ئاواتەخوازین ڕووسیا لەم ڕێڕەوە نوێیەدا لە پاڵمان بێت''.
وەزیری دەرەوەی سووریا، سەبارەت بە باروودۆخی ناوەخۆی سووریاش ڕایگەیاند: ''لە 8ـی کانوونی یەکەمەوە، کارمان لەسەر پڕکردنەوەی بۆشایی سیاسی کردووە و توانیومانە پارێزگاری لە دامەزراوەکانی دەوڵەت بکەین''.
کۆمێنت (0)
تا ئێستا هیچ کۆمێنتێک نەکراوە.