ئاگر لە کەمپی بێرسڤێ یەکی زاخۆ کەوتەوە

بەرەبەیانیی ئەمڕۆ یەکشەممە، لە کەمپی ئاوارەکانی بێرسڤێ-1 لە سنووری ئیدارەی سەربەخۆی زاخۆ، ئاگر لە دوو خێوەت کەوتەوە، بەرگریی شارستانیی زاخۆش ڕایگەیاند کە ئاگرەکەیان کۆنترۆڵ کردووە و هیچ زیانێکی گیانیی لێ نەکەوتووەتەوە.

بەڕێوەبەرایەتیی بەرگریی شارستانیی زاخۆ لە ڕاگەیێندراوێکدا بڵاوی کردەوە کە کاتژمێر 5:30ـی بەرەبەیانیی ئەمڕۆ یەکشەممە،  ئاگادار کراونەتەوە لە کەوتنەوەی ئاگرێک لە دوو خێوەتی کەمپی بێرسڤێ-1 لە ناحیەی دەرکار.

لە ڕاگەیێندراوەکەدا هاتووە، دەستبەجێ تیمەکانی بنکەی بەرگریی شارستانیی دەرکار گەیشتوونەتە شوێنی ڕووداوەکە، توانیویانە ئاگرەکە بە تەواوی کۆنترۆڵ بکەن و ڕێگری بکەن لە تەشەنەسەندنی بۆ خێوەتەکانی دیکەی کەمپەکە.

بەرگریی شارستانیی زاخۆ جەختی لەوە کردەوە کە ڕووداوەکە هیچ زیانێکی گیانیی لێ نەکەوتووەتەوە و تەنیا زیانی ماددی بەر دوو خێوەتەکە کەوتووە. هاوکات لێکۆڵینەوە لە هۆکاری کەوتنەوەی ئاگرەکە دەستی پێ کردووە.