ئەنجومەنی وەزیرانی هەرێمی کوردستان، ئەمڕۆ بە سەرپەرشتیی مەسرور بارزانی کۆ دەبێتەوە و دواڕێککەوتنی نێوان حکوومەتی هەرێمی کوردستان و حکوومەتی فیدراڵی و کۆنووسی کۆبوونەوەی تایبەت بە جێبەجێکردنی دەقی ڕێککەوتننامەکە تاوتوێ دەکات.
ئەمڕۆ چوارشەممە، 23ی تەمووزی 2025، فەرمانگەی میدیا و زانیاریی حکوومەتی هەرێمی کوردستان رایگەیاند: "ئەنجومەنی وەزیران بە سەرپەرشتیی سەرۆكی حكوومەتی هەرێمی كوردستان مەسرور بارزانی، كۆ دەبێتەوە و دوو بڕگە تاووتوێ دەكات".
بە پێی ڕاگەیاندراوەکە "لە بڕگەی یەكەمدا پێشهاتەكانی ئەمدواییەی تایبەت بە جێبەجێكردنی دواڕێككەوتن و لەیەكترگەیشتنی هاوبەشی نێوان هەردوو حكوومەتی هەرێم و حكوومەتی فیدڕاڵیی پەسندكراو بە بڕیاری ئەنجومەنی وەزیرانی هەردوولا سەبارەت بە دۆسیەی مووچە و شایستە داراییەكانی هەرێم و دۆسیەی نەوت و داهاتی نانەوتی تاوتوێ دەكرێ".
لە بڕگەی دووەمدا كۆنووسی كۆبوونەوەی تایبەت بە جێبەجێكردنی دەقی ڕێككەوتننامەی نێوان حكوومەتی هەرێمی كوردستان و حكوومەتی فیدراڵی بە مەبەستی دانانی میكانیزمی ڕێكخستنی كارەكانی دەستەی پێوانەسازی و كۆنترۆڵی جۆریی هەرێم تاوتوێ دەكرێ.
کۆمێنت (0)
تا ئێستا هیچ کۆمێنتێک نەکراوە.