كۆمەڵەی پیشەسازی نەوتی كوردستان (ئەپیكۆر) راگەیەنراوێك لەبارەی هێرشە درۆنییەكانی چەند رۆژی رابردوو بۆ سەر كێڵگە نەوتییەكانی هەرێمی كوردستان بڵاو دەكاتەوە و رایدەگەیەنێت "بەهۆی ئەم هێرشانە زۆربەی كۆمپانیا نەوتییەكان كاری بەرهەمهێنانیان لە كێڵگە نەوتییەكان راگرتووە".
ئەپیكۆر لە راگەیەنراوكەدا دەڵێت: بە توندی هێرشەكان بۆ سەر دامەزراوە نەوتییەكانی هەرێمی كوردستان سەركۆنە دەكەین.
هەروەها دەڵێت: ئەو هێرشانە بوونەتە مەترسی بۆ سەر گیانی كارمەندە ناوخۆیی و بیانییەكانمان و زیانی ماددیشی بە كێڵگە نەوتییەكان گەیاندووە.
ئەپیکور ئاماژەی بەوەشکردووە: ئێستا کۆمپانیاکان خەریکی هەڵسەنگاندنی ئەو زیانانەن كە بەر كێڵگە نەوتییەكان كەوتوون.
كۆمەڵەی پیشەسازی نەوتی كوردستان دەشڵێت: بەهۆی ئەو هێرشانەوە زۆربەی كۆمپانیا نەوتییەكانی سەر بە كۆمەڵەی پیشەسازی نەوتی كوردستان (ئەپیكۆر) بەوانەشەوە كە نەكراونەتە ئامانج، كارەكانی بەرهەمهێنانیان لە كێڵگە نەوتییەكان راگرتووە.
ئەپیكۆر لە كۆتاییدا داوای لە حكوومەتی هەرێم و حكوومەتی فیدڕاڵی كرد رێكاری زیاتر بگرنەبەر بۆ پاراستنی گیانی كارمەند و كرێكارەكانیان لە كێڵگە نەوتییەكاندا.
کۆمێنت (0)
تا ئێستا هیچ کۆمێنتێک نەکراوە.