کەناڵی (DW)ی ئەڵمانی لەسەر داوای جڤاكی كوردی، ئەمڕۆ سێشەممە ڕەزامەندی دەربری لەسەر کردنەوەی بەشی کوردی لە دەزگاكەیان.
عەلی ئەرتان سەرۆکی جڤاکی کوردی لە ئەڵمانیا بە (کوردستان تیڤی) راگەیاند: دوای هەوڵێکی زۆر لەگەڵ بەرپرسانی کەناڵی DW بڕیاردرا بەشی کوردی لە دەزگاكەیان بكەنەوە.
راشیگەیاند: لە داهاتوویەكی نزیكدا كەناڵەكە رۆژانە لە ڕادیۆ و تەلەفزیۆن و تۆڕەكانی كۆمەڵایەتی بە زمانی كوردی پەخشی خۆیان دەكەن.
هەروەها رایگەیاند: ئێمە وەك ڕەوەندی کوردستانی لە ئەڵمانیا لەگەڵ بەڕێوبەرایەتی کەناڵەكە كۆبووینەوە و ئەوان ڕەزامەندییان نیشان دا كە بەشی کوردی لە دەزگاكەیان زیاد بکەن.
عەلی ئەرتان نەشی شاردەوە كە تا ئێستا روون نەبووەتەوە پەخشی كوردی لە كەناڵەكە بە چ زاراوەیەک و چۆن و كەی دەبێت، بەڵام لە داهاتوویەكی نزیكدا پەخشەكە دەست پێ دەكات.
ئەڵمانیا / خالید عەلی
کۆمێنت (0)
تا ئێستا هیچ کۆمێنتێک نەکراوە.