حکوومەتی هەرێمی کوردستان بڕیاری داوە گەنمی ماوەی جووتیارانی کوردستان کە وەزارەتی بازرگانیی عێراق وەری نەگرتووە، لە جووتیاران بکڕێتەوە و لە رێگەی کەرتی تایبەتەوە وەری بگرێت. پڕۆسەکە لە 15ی تەمووزەوە دەست پێ دەکات.
ئەمڕۆ سێشەممە 8ـی تەمووزی 2025،محەمەد شوکری سەرۆکی دەستەی وەبەرهێنان بە ئالان ئەحمەد پەیامنێری کوردستان تیڤی ڕاگەیاند: "ماوەی سێ ساڵە حکوومەتی هەرێمی کوردستان گەنمی جوتیاران دەکڕێتەوە و لە بازاڕەکان بە نرخی گونجاو ساخیان دەکاتەوە".
محەمەد شوکری دەڵێت، وادەی وەرگرتنی گەنمی جوتیاران لە 15ـی تەمووز کۆتایی دێت و حکوومەتی هەرێمی کوردستان دەست بە کڕێنەوەی ئەو گەنمانە دەکات کە حکوومەتی فیدراڵی عیراق نەیان کڕیوەتەوە بۆ ئەوەی گەنمی خوتیاران بەفیرۆ نەچێت یان ناچار نەبن هەرزانفرۆشی بکەن .
سەبارەت بە نرخی کڕینی گەنمی جوتیاران لەلایەن کەرتی تایبەتەوە گوتی، گەنمی پلە یەک بە 550 هەزار دینار دەکڕدرێت و نرخی گەنمی پلە دوو 500 هەزارە، ئەم نرخانە لەلایەن لیژنەیەکەوە دیاری دەکرێن کە لە وەزارەتی کشتوکاڵ و وەزارەتی بازرگانی پێکهاتوون.
لەم چەند ساڵەی دواییدا وەزارەتی کشتوکاڵ 110 هەزار خانووی شووشەی زیاد کردووە و بە مەبەستی پاراستنی بەربوومی خۆماڵی، قەبارەی پاشەکەوتکردنی بەروبوومەکان لە ساردکەرەوەکان زیاد کراوە.
سەبارەت بە دوایین پلانەکانی حکوومەتی هەرێم بۆ بەروبوومی خۆماڵی گوتی: حکوومەتی هەرێمی کوردستان داوای کردووە بەربوومەکانمان بدرێنە کارگەکانی بەرهەمهێنانی خۆراک بۆ ئەوەی بەرهەمی خۆماڵی لە هەموو مارکێتەکان بەردەست بێت.
کۆمێنت (0)
تا ئێستا هیچ کۆمێنتێک نەکراوە.