وەزیری دەرەوەی عومان جەختی لەسەر پێویستیی دەستپێکردنەوەی گفتوگۆکان لەنێوان ئێران و ئەمریکا کردەوە.
ئەمڕۆ سێشەممە 1ـی تەمووز، بەدر ئەلبوسعیدی وەزیری دەرەوەی عومان جەختی لەسەر پێویستیی نەرمینواندن کردەوە بۆ دەستپێکردنەوەی گفتوگۆ ئەتۆمییەکان لەنێوان ئەمریکا و ئێران.
ناوبراو ئاماژەی بەوەش کرد کە هەوڵەکان بۆ دەستپێکردنەوەی گفتوگۆکان و لێکنزیککردنەوەی بۆچوونەکان لەنێوان ئێران و ئەمریکا بەردەوامن.
هەروەها سەرۆکی دەزگای دیپلۆماسیی عومان روونی کردەوە کە تا ئێستا هیچ وادەیەک بۆ دەستپێکردنەوەی گفتوگۆکانی نێوان ئێران و ئەمریکا دیاری نەکراوە.
ناوبراو ڕوونی کردەوە کە عومان بەردەوام دەبێت لە ناوبژیوانییەکەی بە ئامانجی پاراستنی ئاگربەست لەنێوان ئیسرائیل و ئێران، کەمکردنەوەی گرژییەکان و پێشخستنی هەوڵەکان بۆ دەستپێکردنەوەی گفتوگۆکانی تاران و واشنتۆن.
وەزیری دەرەوەی عومان وێڕای جەختکردنەوە لەسەر پابەندبوونی عومان بە هەوڵە ئاشتیخوازانەکان بۆ چارەسەری قەیرانە ناوچەیی و نێودەوڵەتییەکان لە ڕێگەی گفتوگۆ و دیپلۆماسییەوە، داوای لە تاران و واشنتن کرد نیازپاکیی ڕاستەقینەیان هەبێت بۆ لێکنزیککردنەوەی بۆچوونەکان و گەڕانەوە بۆ سەر مێزی گفتوگۆ.
کۆمێنت (0)
تا ئێستا هیچ کۆمێنتێک نەکراوە.