جێگری پارێزگاری نەینەوا مژدەی چارەسەركردنی كێشەی گەنمی ئەمساڵی جوتیارانی مەخموور و شارەدێكانی دەوروبەری راگەیاند و گوتی، لە رۆژی سێشەممەوە دەتوانن بەرهەمەكانیان ڕادەستی سایلۆی مەخموور بكەن.
سیروان رۆژبەیانی جێگری پارێزگاری نەینەوا تایبەت بە (كوردستان تیڤی) راگەیاند: ئەمڕۆ یەكشەممە كۆبوونەوەیەكی تایبەت لەنێوان پارێزگاری نەينەوا و وەزيری بازرگانیی حكوومەتی فيدراڵ لەسەر نيگەرانی و نارەزایەتییەكانی جوتيارانی سنووری شارۆچكەی مخموور و شارەدێكانی دەوروبەری، ئەنجامدرا.
راشیگەیاند: له ڕێگەی (كوردستان تیڤی)يەوە مژده دەدەینە جوتيارانی سنووری شارۆچكەی مەخموور و شارەدێكانی دەوروبەری كە خۆشبەختانە لە كۆبوونەوەكەدا توانرا كێشەكه بەتەواوەتی چارەسەر بكرێت.
سیروان رۆژبەیانی هەروەها رایگەیاند: جوتيارانی سنووری شارۆچكەی مەخموور و شارەدێكانی دەوروبەری ئاگادار دەكەینەوە كە لە ڕۆژی سێشەممه ڕێكەوتی 24/6/2025 دەرگەی سايلۆی دەكرێتەوه به ڕووی جوتيارانی سنوورەكه بۆ ڕادەستكردنی بەرهەمی ئەمساڵی گەنمەكانیان.
جێگری پارێزگاری نەینەوا جەختیشی كردەوە كە سەرجەم جووتيارانی شارۆچكەی مخموور و شارەدێكانی قەراج و كەندێناوه و گوێڕ و مەلاقەره و شوێنەكانی دیكە، دەتوانن رۆژی سێشەممە له سايلۆی مەخموور گەنمی ئەمساڵيان ڕادەست بكەن.
کۆمێنت (0)
تا ئێستا هیچ کۆمێنتێک نەکراوە.