وەزارەتی تەندروستی ئاشكرای دەكات كە سێ حاڵەتی تووشبووی نەخۆشی ئایدزیان لە ساڵۆنەكانی ئافرەتان دەستنیشان كردووە و داواش لە هاووڵاتییان دەكات خۆیان بەدوور بگرن لە شوێنی نافەرمی.
وەزارەتی تەندروستی لە راگەیەنراوێكدا بڵاوی كردەوە: دوای پشکنینی تاقیگەیی ڕۆژانە بۆ کارمەندانی شوێنە گشتییەکان و دەرهێنان و نوێکردنەوەی مۆڵەتی تەندروستی، سێ حاڵەتی هەڵگری ڤایرۆسی (HIV) بۆ تووشبوون بە نەخۆشی ئەیدز لەلایەن تیمەکانی تەندروستی دەستنیشان کرا کە لە ساڵۆنەکانی ئافرەتان کاریان دەکرد.
بڵاویشی كردەوە: سەرجەم تووشبووەكان بیانی بوون و ڕێکاری پێویستیان بەرامبەر گیرایە بەر.
وەزارەتی تەندروستی هەروەها هاووڵاتییانی ئاگادار كردەوە كە خۆیان بەدوور بگرن لە شوێنی نافەرمی، لە كاتی سەردانی شوێنی فەرمی و شوێنە گشتییەکانیش پرسیاری مۆڵەتی تەندروستییان لێ بکەن.
هەروەها داواشی كرد لە كاتی بوونی هەر گومانێک لە نەبوونی مۆڵەت یان دیاردەیەکی نا تەندروست، ئەرکێکی نیشتمانی و مرۆییە لەڕێگەی هێڵە گەرمەکانی پەیوەندی یان سندووقی سکاڵا، تیمەکانی تەندروستی لێ ئاگادار بکەنەوە.
کۆمێنت (0)
تا ئێستا هیچ کۆمێنتێک نەکراوە.