بەرشلۆنە یاریی كلاسیكۆی بردەوە و لە بەدەستهێنانی خولی ئیسپانیا زیاتر نزیك بووەوە

یانەی بەرشەلۆنە یاریی كلاسیكۆی بۆ بەرژەوەندی خۆی بەكۆتاهێنا و بەمەش لە بەدەستهێنانی ناسناوی ئەمساڵی خولی ئیسپانیا نزیكتر بووەوە.

ئێوارەی ئەمڕۆ یەكشەممە لە گەڕی 35ی خولی ئیسپانیا، یانەی بەرشەلۆنە مێوانداریی یانە ركابەرەكەی ریال مەدریدی كرد و یارییەكەشی بە ئەنجامی 4-3 گۆڵ لێ بردەوە.

بەشی زۆری گۆڵەكانی یارییەكە لە گێمی یەكەم هاتنە تۆماركردن، سەرەتا یانەی ریال مەدرید دوو گۆڵی لە رێگەی كیلیان مباپێ لە خولەكانی 5 و 14 تۆمار كرد، دواتر یانەی بەرشەلۆنە چوار گۆڵی یەك لە دوای یەكی لە رێگەی یاریزانان ئیریك گارسیا لە خولەكی 19، لامین یامال لە خولەكی 32، رافینیا دوو گۆڵ لە خولەكانی 34 و 45 تۆمار كرد.

لە گێمی دووەمدا مباپێ گۆڵی هاتریكی خۆی و سێیەمی یانەی ریال مەدرید لە خولەكی 70 تۆمار كرد، بەمەش یارییەكە بە ئەنجامی 4-3 گۆڵ بۆ بەرژەوەندی یانەی بەرشلۆن كۆتایی هات.

یانەی بەرشەلۆنە بەم سەركەوتنە جیاوازی خاڵەكانی لەگەڵ یانەی ریال مەدرید كردە 7 خاڵ، یانە كەتەلۆنییەكە ئێستا بە كۆكردنەوەی 82 خاڵ لە ریزبەندی یەكەمی یانەكانی خولی ئیسپانیایە، یانەی ریال مەدریدیش بە 75 خاڵ لە ریزبەندی دووەم مایەوە.