وەزارەتی دەرەوەی ئەمەریكا رایدەگەیەنێت، بڕی 15 ملیۆن دۆلار وەك پاداشت دەداتە هەر كەسێك زانیارییان پێ بدات سەبارەت بە هاوكارییەكانی چین بۆ ئێران.
وەزارەتی دەرەوەی ئەمەریكا لە راگەیەنراوێكدا بڵاوی كردۆتەوە: لەچوارچێوەی بەرنامەی (پاداشت لەپێناو دادپەروەریدا)، هەر كەس و لایەنێك زانیارییمان پێ بدات لەبارەی هاوكارییە داراییەكانی وڵاتی چین بۆ سوپای پاسدارانی ئێران بە بڕی 15 ملیۆن دۆلار پاداشت دەكرێت.
ئەمەریكا زانیاری هەیە كە چەند كەس و لایەنێك لەنێو وڵاتی چینەوە هاوكاری دارایی و تەكنەلۆژی و كەلوپەلی سەربازی پێشكەش بە سوپای پاسدارانی ئێرانی دەكەن بەتایبەتیش فەیلەقی قودس كە لەلایەن ئەمەریكاوە خراوەتە لیستی تیرۆری نێودەوڵەتییەوە.
وەزارەتی دەرەوەی ئەمەریكا پێیوایە سوپای پاسداران لە پشت زۆرێك لەو هێرشە تیرۆریستییانەوەیە كە ئێستا لە جیهاندا ئەنجام دەدرێن، هەروەها هەر ئەویشە هاوكاریی دارایی و سەربازی دەگەیەنێتە بزووتنەوەی حەماسی فەڵەستینی و حزبوڵای لوبنانی و میلیشیاكانی عێراق.
وەزارەتەكە جەختیش لەوە دەكاتەوە كە سوپای پاسداران بەشێك لە كەلوپەلەكانی دروستكردنی درۆن و فڕۆكە بێ فڕۆكەوانەكان لە وڵاتانی دەرەوە هاوردە دەكات.
کۆمێنت (0)
تا ئێستا هیچ کۆمێنتێک نەکراوە.