سوپای ئیسڕائیل ئەمڕۆ چوارشەممە دەستپێكردنی هێرشی زەمینیی بۆ سەر كەرتی غەززە راگەیاند، دوای ئەوەی ماوەی دوو مانگ بوو بە رێككەوتن و ئاگربەست هێرشەكان راگیرابوون.
سوپای ئیسڕائیل رایگەیاند: ئەمڕۆ چوارشەممە هێزەكانمان لە ناوەڕاست و باشووری غەززە دەستیان بە پێشڕەوی كرد، ئامانج لە هێرشەكەش دروستكردنی ناوچەیەكی ئارامە لەنێوان باكور و باشووری غەززەدا.
ئەفیخای ئەدرەعی گوتەبێژی سوپای ئیسڕائیل لە تۆڕی كۆمەڵایەتی ئێكس رایگەیاند: لە ماوەی 24 كاتژمێری رابردوودا سوپای ئیسڕائیل دەستی بە هێرشێكی زەمینی تۆكمە كردووە بەو ئامانجەی ناوچەیەكی ئارام لەنێوان باكور و باشووری غەززە بهێنرێتە كایەوە.
راشیگەیاندبوو: لە هێرشەكاندا سوپای ئیسڕائیل دەستی گرتووە بەسەر چەند ناوچەیەكی نەتەساریم لە ناوەڕاستی غەززە.
سوپای ئیسڕائیل دوێنێ سێشەممە بەفەرمی دەستپێكردنەوەی ئۆپەڕاسیۆنەكانی لە دژی بزووتنەوەی حەماس و جیهانی ئیسلامی لە كەرتی غەززە راگەیاند.
هەر دوێنێ سێشەممە چەند بنكە و بارەگایەكی بزووتنەوەی حەماس و جیهانی ئیسلامی لە كەرتی غەززە كرانە ئامانج.
وەزارەتی تەندروستی لە غەززە ئاشكرای كرد كە بەهۆی بۆردومانەكانی دوێنێ سێشەممەی ئیسڕائیل بۆ سەر كەرتی غەززە نزیكەی 500 كەس كوژران لەنێویاندا كۆمەڵێك فەرماندەی بزووتنەوەی حەماس هەبوون.
لە كۆتاییەكانی مانگی یەكی ئەمساڵ بە نێوەندگیری هەردوو وڵاتی میسڕ و قەتەڕ، قۆناغی یەكەمی ئاگربەست لەنێوان ئیسڕائیل و بزووتنەوەی حەماس راگەیەنرا، ئاگربەستەكە بۆ ماوەی شەش هەفتە بوو، بڕیاریشدرابوو لەو ماوەیەدا لە كۆی 98 دیلی ئیسڕائیلی 33 دیلیان ئازاد بكرێن و لەبەرامبەریشدا نزیكەی دوو هەزار دەستگیركراوی فەڵەستینی لە گرتووخانەكانی ئیسڕائیل ئازاد بكرێن.
کۆمێنت (0)
تا ئێستا هیچ کۆمێنتێک نەکراوە.